မအူပင်(တောင်) ရေနံနှင့် သဘာဝဓာတ်ငွေ့မြေမှ ထွက်ရှိသည့် ဓာတ်ငွေ့များကို လျှပ်စစ်ထုတ်လုပ်ရန် ဖြန့်ဖြူးပေးနေ

ဧရာဝတီတိုင်းဒေသကြီး၊ မအူပင်မြို့နယ်ရှိ မအူပင်(တောင်) ရေနံနှင့် သဘာဝဓာတ်ငွေ့မြေ တွင်းအမှတ် (၁၄) မှ တိုးတက်ထွက်ရှိလာသော သဘာဝဓာတ်ငွေ့များကို လျှပ်စစ်ဓာတ်အား ထုတ်လုပ်နိုင်ရန်အတွက် ရန်ကုန်မြို့ရှိ ရွာမထိန်းဖြန့်စခန်းမှတစ်ဆင့် စတင်ဖြန့်ဖြူးပေးနေပြီဖြစ်ကြောင်း လျှပ်စစ်နှင့် စွမ်းအင်ဝန်ကြီးဌာနမှ သိရသည်။ အဆိုပါတွင်းမှ ဧပြီလ ၂၈ ရက်နေ့တွင် သဘာဝဓာတ်ငွေ့ ကုဗပေ ၂ သန်းခန့် တိုးတက်ထုတ်လုပ်နိုင်ခဲ့ခြင်းဖြစ်ပြီး၊ ၂၀၂၃ ခုနှစ်ကုန်ပိုင်းမှစ၍ အဖျောက်နှင့် မအူပင်ဒေသရှိ ပါးလွှာသဲကြောများကို သုတေသနပြုဖောက်ယူရရှိသည့် ဓာတ်ငွေ့များကို CNG မော်တော်ယာဉ်များ၊ စက်ရုံများနှင့် လျှပ်စစ်ကဏ္ဍတို့တွင် အကျိုးရှိရှိ ခွဲဝေသုံးစွဲလျက်ရှိသည်။ ဝန်ကြီးဌာနအနေဖြင့် ပြည်ပမှ စွမ်းအင်သွင်းကုန်များ လျှော့ချနိုင်ရန်နှင့် နိုင်ငံတော်စွမ်းအင်လုံခြုံရေး တိုးမြှင့်ရန်အတွက် ပြည်တွင်းရေနံနှင့် သဘာဝဓာတ်ငွေ့မြေများမှ ထုတ်လုပ်မှုတိုးတက်စေရန် ရေတို၊ ရေရှည်စီမံကိန်းများဖြင့် ကြိုးပမ်းဆောင်ရွက်နေကြောင်း သိရှိရပါသည်။