ထိုင်းနိုင်ငံတွင် ရွှေဆိုင်အား ဝင်ရောက်လုယက်ခဲ့သည့် တရုတ်နိုင်ငံသားနှစ်ဦးကို ဘန်ကောက်၌ ဖမ်းဆီးရမိ

ထိုင်းနိုင်ငံ၊ နခွန်ရက်ချာစီမာခရိုင်ရှိ ရွှေဆိုင်တစ်ဆိုင်ကို ဧပြီလ ၂၇ ရက် နံနက်ပိုင်းက မျက်နှာဖုံးစွပ်၍ ဝင်ရောက်လုယက်ကာ ဘတ် ၃ သိန်းခန့်တန်ဖိုးရှိ ရွှေလက်စွပ်များကို ယူဆောင်ထွက်ပြေးသွားသည့် တရုတ်နိုင်ငံသားနှစ်ဦးကို ရဲတပ်ဖွဲ့က ဘန်ကောက်မြို့၌ ပြန်လည်ဖမ်းဆီးရမိခဲ့သည်။ အသက် ၂၇ နှစ်နှင့် ၁၉ နှစ်အရွယ်ရှိ အဆိုပါတရုတ်အမျိုးသားနှစ်ဦးသည် ကမ္ဘာလှည့်ခရီးသွားဗီဇာဖြင့် ထိုင်းနိုင်ငံသို့ ဝင်ရောက်လာသူများဖြစ်ပြီး ငွေကြေးပြတ်လပ်သွားသဖြင့် ယခုကဲ့သို့ လုယက်ရန် စီစဉ်ခဲ့ခြင်းဖြစ်ကြောင်း ဝန်ခံထားသည်။ ၎င်းတို့သည် လုယက်မှုအပြီး နံပါတ်ပြားမပါသည့် ကားဖြင့် ထွက်ပြေးခဲ့သော်လည်း ရဲတပ်ဖွဲ့က ကားငှားရမ်းသည့်ကုမ္ပဏီမှတစ်ဆင့် ခြေရာခံကာ လုယက်ထားသည့် ရွှေထည်များနှင့်အတူ ဖမ်းဆီးနိုင်ခဲ့ခြင်းဖြစ်ပြီး လက်ရှိတွင် ဥပဒေအရ ထိရောက်စွာ အရေးယူနိုင်ရန် စစ်ဆေးမေးမြန်းမှုများ ဆက်လက်ဆောင်ရွက်လျက်ရှိကြောင်း သိရှိရပါသည်။