ဂျပန်က ရေပေါ်လေအားလျှပ်စစ်စီမံကိန်းကို ၂၀၃၅ တွင်လုပ်ဆောင်မည်

ဂျပန်နိုင်ငံသည် အိုင်ဇုကျွန်းစုအလွန်ပင်လယ်ပြင်တွင် နျူကလီးယားဓာတ်ပေါင်းဖိုတစ်ခု၏ ထုတ်လုပ်နိုင်စွမ်းနှင့်ညီမျှသော ၁ ဂစ်ဂါဝပ်ထုတ်လုပ်မည့် ကမ္ဘာ့အကြီးဆုံး ရေပေါ်လေအားလျှပ်စစ်စီမံကိန်းကို ၂၀၃၅ ခုနှစ်တွင် အကောင်အထည်ဖော်ရန် လျာထားကြောင်း သိရသည်။ အဆိုပါစီမံကိန်းအတွက် ၂၀၂၆ ဘဏ္ဍာရေးနှစ်တွင် ယန်း ၂.၇ ဘီလျံ လျာထားပြီး ပင်လယ်ရေအောက်ကေဘယ်ကြိုးများမှတစ်ဆင့် တိုကျိုမြို့သို့ လျှပ်စစ်ဓာတ်အားပေးပို့ရန် ရည်ရွယ်ထားသော်လည်း၊ ရှုပ်ထွေးသော အင်ဂျင်နီယာပိုင်းဆိုင်ရာ စိန်ခေါ်မှုများ၊ မြင့်မားသောကုန်ကျစရိတ်နှင့် နည်းပညာပိုင်းဆိုင်ရာ လိုအပ်ချက်များကြောင့် သတ်မှတ်ချိန်အတွင်း အပြည့်အဝအကောင်အထည်ဖော်နိုင်မလားဆိုသည်မှာ ပညာရှင်များအကြား မေးခွန်းထုတ်စရာ ဖြစ်နေပါသည်။ ပတ်ဝန်းကျင်ထိခိုက်မှုနည်းသော ရေပေါ်တာဘိုင်များကို အသုံးပြုမည့် ဤစီမံကိန်းသည် ဂျပန်နိုင်ငံအတွက် မဟာဗျူဟာမြောက် ရည်မှန်းချက်တစ်ခုဖြစ်သော်လည်း လက်တွေ့တွင် ၂၀၃၀ ပြည့်နှစ်နှောင်းပိုင်းမှသာ ကနဦးအဆင့်များ စတင်နိုင်ဖွယ်ရှိကြောင်း သုံးသပ်ထားကြပါသည်။