ဗီယက်နမ်နိုင်ငံ၊ လမ်ဒေါင်ပြည်နယ်ရှိ ဖနွမ်းသီးလေဆိပ်၏ ဒေါ်လာ ၁၅၂ သန်းတန် အရပ်ဘက်သုံးလေကြောင်းကဏ္ဍကို Sun Group က စတင်ပန္နက်ချ

ဗီယက်နမ်နိုင်ငံ၏ နာမည်ကြီးလုပ်ငန်းစုဖြစ်သော Sun Group သည် လမ်ဒေါင် (Lam Dong) ပြည်နယ်ရှိ ဖနွမ်းသီး (Phan Thiet) လေဆိပ်၏ အရပ်ဘက်သုံးလေကြောင်းဆိုင်ရာ အခြေခံအဆောက်အအုံများ တည်ဆောက်ရေးစီမံကိန်းကို ၂၀၂၆ ခုနှစ်၊ ဧပြီလ ၂၇ ရက်နေ့တွင် စတင်ပန္နက်ချလိုက်ပြီဖြစ်ပြီး၊ ဤစီမံကိန်းသည် စုစုပေါင်းရင်းနှီးမြှုပ်နှံမှု ဗီယက်နမ်ဒေါင် ၃.၉ ထရီလီယံ (အမေရိကန်ဒေါ်လာ ၁၅၂ သန်းခန့်) ရှိကာ နိုင်ငံအတွင်း ပုဂ္ဂလိကရင်းနှီးမြှုပ်နှံမှုဖြင့် အပြည့်အဝအကောင်အထည်ဖော်သည့် ပထမဆုံးသော အရပ်ဘက်လေဆိပ်စီမံကိန်းဖြစ်လာမည်ဖြစ်သည်။ ဧရိယာ ၇၄.၆ ဟက်တာပေါ်တွင် တည်ဆောက်မည့် ဤစီမံကိန်းတွင် တစ်နှစ်လျှင် ခရီးသည် ၂ သန်းအထိ ဝန်ဆောင်မှုပေးနိုင်မည့် စတုရန်းမီတာ ၁၈,၀၀၀ ရှိသော ခရီးသည်တင်အဆောက်အအုံ (Passenger Terminal)၊ လေယာဉ်ရပ်နားကွင်း (Apron)၊ ၄၅ မီတာမြင့်သော လေကြောင်းထိန်းသိမ်းရေးမျှော်စင်နှင့် အခြားခေတ်မီနည်းပညာသုံး စနစ်များ ပါဝင်မည်ဖြစ်ပြီး ICAO 4E စံနှုန်းနှင့်အညီ တည်ဆောက်သွားမည်ဖြစ်သည်။ ဖနွမ်းသီးလေဆိပ်သည် စစ်ဘက်နှင့် အရပ်ဘက် နှစ်မျိုးသုံး (Dual-use) လေဆိပ်ဖြစ်ပြီး ပြေးလမ်းစနစ်ကို စစ်ဘက်နှင့် မျှဝေအသုံးပြုကာ အမျိုးသားလုံုံခြုံရေးနှင့် စီးပွားရေးဖွံ့ဖြိုးမှုကို ဟန်ချက်ညီစေရန် ရည်ရွယ်ထားပြီး၊ စီမံကိန်းပြီးစီးပါက ဗဟိုကုန်းမြင့်ဒေသ (Central Highlands) နှင့် ကမ်းရိုးတန်းဒေသများအကြား ဆက်သွယ်ရေးကို ပိုမိုကောင်းမွန်စေကာ လမ်ဒေါင်ပြည်နယ်၏ ခရီးသွားကဏ္ဍကို အရှိန်အဟုန်ဖြင့် မြှင့်တင်ပေးနိုင်မည်ဟု မျှော်မှန်းထားကြောင်း သိရသည်။