ဂျပန်နိုင်ငံ၊ တိုကျိုမြို့ ရုပွန်ဂီအရပ်တွင် ၂၀၁၈ ခုနှစ်က ဖြစ်ပွားခဲ့သော လူသတ်မှုသံသယရှိသူကို မလေးရှားနိုင်ငံမှ ပြန်လည်ဖမ်းဆီး

ဂျပန်နိုင်ငံ၊ တိုကျိုမြို့ ရုပွန်ဂီ (Roppongi) အရပ်ရှိ တိုက်ခန်းတစ်ခုအတွင်း ၂၀၁၈ ခုနှစ်က အသက် ၂၉ နှစ်အရွယ် အမျိုးသမီးတစ်ဦး အသတ်ခံခဲ့ရသည့် ဖြစ်စဉ်နှင့် ပတ်သက်၍ သံသယရှိသူ အသက် ၄၇ နှစ်အရွယ် နိုဘူအာကီ တာကာဟာရှီ (Nobuaki Takahashi) ကို ၂၀၂၆ ခုနှစ်၊ ဧပြီလ ၂၅ ရက် (စနေနေ့) တွင် တိုကျိုရဲတပ်ဖွဲ့က ဖမ်းဆီးလိုက်ပြီဖြစ်ကြောင်း Japan Times က ဖော်ပြခဲ့သည်။ သံသယရှိသူသည် လူသတ်မှုဖြစ်ပွားပြီး နောက်တစ်ရက်တွင် မလေးရှားနိုင်ငံသို့ ထွက်ပြေးတိမ်းရှောင်သွားခဲ့သူဖြစ်ပြီး၊ ဂျပန်ရဲတပ်ဖွဲ့က အပြည်ပြည်ဆိုင်ရာ ရဲတပ်ဖွဲ့ (Interpol) မှတစ်ဆင့် အပြည်ပြည်ဆိုင်ရာ ဖမ်းဝရမ်းထုတ်ကာ ရှာဖွေခဲ့ခြင်းဖြစ်သည်။ မလေးရှားအာဏာပိုင်များက ၎င်းအား ထိန်းသိမ်းထားကြောင်း အကြောင်းကြားခဲ့ပြီးနောက် ဂျပန်ရဲတပ်ဖွဲ့သည် မလေးရှားသို့ သွားရောက်ကာ သံသယရှိသူအား ဂျပန်နိုင်ငံ၊ နာရီတာလေဆိပ်သို့ ပျံသန်းသည့် လေယာဉ်ပေါ်တွင် ဖမ်းဆီးခဲ့ခြင်းဖြစ်သည်။ ၂၀၁၈ ခုနှစ်၊ အောက်တိုဘာလအတွင်းက သေဆုံးသူအမျိုးသမီးအား တုံးသောပစ္စည်းဖြင့် ဦးခေါင်းကို အကြိမ်ကြိမ်ရိုက်နှက် သတ်ဖြတ်ခဲ့သည်ဟု ရဲတပ်ဖွဲ့က သံသယရှိနေပြီး အခင်းဖြစ်ပွားရာနေရာတွင် သွေးစွန်းနေသော အလေးတုံး (Dumbbell) တစ်ခုကိုလည်း တွေ့ရှိခဲ့သည်။ လက်ရှိတွင် သံသယရှိသူက ၎င်းအနေဖြင့် ပြောစရာမရှိကြောင်း ထွက်ဆိုထားသော်လည်း ရဲတပ်ဖွဲ့က ဖြစ်စဉ်အသေးစိတ်ကို ဆက်လက်စစ်ဆေးလျက်ရှိကြောင်း သိရသည်။