ဗီယက်နမ်နိုင်ငံအလယ်ပိုင်းတွင် ၂၀၂၆ ခုနှစ်၊ ဧပြီလ ၂၂ ရက် (ဗုဒ္ဓဟူးနေ့) နံနက်ပိုင်းက အင်အားအနည်းငယ်ရှိသော ငလျင် ၅ ကြိမ် ဆက်တိုက်လှုပ်ခတ်ခဲ့ကြောင်း ဗီယက်နမ်ဘူမိဗေဒနှင့် မြေငလျင်ဌာန၏ ထုတ်ပြန်ချက်အရ သိရသည်။ ငလျင်များမှာ နံနက် ၅ နာရီမှ ၈ နာရီအတွင်း လှုပ်ခတ်ခဲ့ခြင်းဖြစ်ပြီး ဒါနန်း (Da Nang) မြို့ရှိ Tra Linh ကျေးရွာစုတွင် ၄ ကြိမ်နှင့် ကွမ်ငိုင် (Quang Ngai) ပြည်နယ်ရှိ Mang But ကျေးရွာစုတွင် ၁ ကြိမ် လှုပ်ခတ်ခဲ့ခြင်းဖြစ်သည်။ ငလျင်အင်အားမှာ ရစ်ခ်ျတာစကေး ၂.၆ မှ ၃.၁ အထိရှိပြီး မြေအောက်အနက် ၈.၁ ကီလိုမီတာခန့်ကို ဗဟိုပြု၍ လှုပ်ခတ်ခဲ့ခြင်းဖြစ်သည်။ မြေငလျင်နှင့် ဆူနာမီသတိပေးစင်တာ၏ ညွှန်ကြားရေးမှူး Nguyen Xuan Anh ၏ ပြောကြားချက်အရ အဆိုပါငလျင်များကြောင့် ထိခိုက်ပျက်စီးမှုနှင့် အန္တရာယ်ဖြစ်နိုင်ခြေ မရှိသော်လည်း ဌာနအနေဖြင့် ဆက်လက်စောင့်ကြည့်လျက်ရှိကြောင်း သိရသည်။ ထို့ပြင် ဧပြီလ ၂၁ ရက် (အင်္ဂါနေ့) ညပိုင်းကလည်း ကွမ်ငိုင်ပြည်နယ်တွင် အင်အား ၂.၈ မှ ၃.၄ အဆင့်ရှိသော မြေတုန်ခါမှု ၃ ကြိမ် ဖြစ်ပွားခဲ့သေးကြောင်း သတင်းတွင် ဖော်ပြထားသည်။
