ကမ္ဘောဒီးယား၊ ဝပ်အက်ဝီယာ (Wat Athvea) ဘုရားကျောင်းတွင် ရိုးရာနတ်ပူဇော်ပွဲ ကျင်းပ

ကမ္ဘောဒီးယား၊စီယမ်ရိ (Siem Reap) ပြည်နယ်ရှိ ဝပ်အက်ဝီယာ (Wat Athvea) ဘုရားကျောင်းတွင် ဒေသခံရွာသူရွာသားများ စုပေါင်း၍ နှစ်စဉ်ကျင်းပမြဲဖြစ်သော ရိုးရာနတ်ပူဇော်ပွဲနှင့် ဝတ်ပြုဆုတောင်းပွဲကို ယမန်နေ့က ကျင်းပခဲ့ကြောင်း ခမ္မားတိုင်းမ် (Khmer Times) သတင်းအရ သိရသည်။ဤအခမ်းအနားသည် နှစ်စဉ် မိုးရာသီအစတွင် ကျင်းပလေ့ရှိပြီး၊ စိုက်ပျိုးရေးအတွက် မိုးလုံလောက်စွာ ရရှိစေရန်၊ ဒေသခံများ ကျန်းမာစေရန်နှင့် ရပ်ရွာအတွင်း ဘေးအန္တရာယ် ကင်းဝေးစေရန် ရည်ရွယ်ခြင်းဖြစ်သည်။ အန်ကော (Angkor) နယ်မြေအတွင်းရှိ ဒေသခံများအတွက် ရှေးဟောင်းဘုရားကျောင်းများသည် အဆောက်အအုံများသာမကဘဲ ၎င်းတို့၏ ယုံကြည်ကိုးကွယ်မှုနှင့် နေ့စဉ်လူနေမှုဘဝတို့ အစဉ်အဆက် ဆက်နွယ်နေသည့် အမွေအနှစ်နေရာများဖြစ်ကြောင်း ပြသနေသည်။အန်ကောနယ်မြေ ထိန်းသိမ်းစောင့်ရှောက်ရေး အာဏာပိုင်အဖွဲ့ (APSARA National Authority) ကလည်း ယခုကဲ့သို့ ရိုးရာယဉ်ကျေးမှု ထုံးတမ်းစဉ်လာများကို မပျောက်ပျက်အောင် ထိန်းသိမ်းခြင်းသည် ဒြပ်မဲ့ယဉ်ကျေးမှု အမွေအနှစ် (Intangible Cultural Heritage) ကို ကာကွယ်ခြင်းဖြစ်သဖြင့် လိုအပ်သော ထောက်ပံ့ကူညီမှုများကို ပေးအပ်ခဲ့ကြောင်း သိရသည်။