ကမ္ဘောဒီးယားနိုင်ငံ၊ ခမာနှစ်သစ်ကူးကာလအတွင်း နိုင်ငံခြားသားခရီးသွား ၇၀,၀၀၀ ကျော် လာရောက်လည်ပတ်

ကမ္ဘောဒီးယားနိုင်ငံ၏ သုံးရက်ကြာ ရိုးရာခမာနှစ်သစ်ကူး (သင်္ကြန်) ပွဲတော်ကာလအတွင်း နိုင်ငံတစ်ဝန်းသို့ နိုင်ငံခြားသားခရီးသွား ၇၁,၁၉၁ ဦး လာရောက်လည်ပတ်ခဲ့ကြောင်း ခမ္မားတိုင်းမ် (Khmer Times) နှင့် ခရီးသွားလာရေးဝန်ကြီးဌာန၏ ထုတ်ပြန်ချက်အရ သိရသည်။ဧပြီလ ၁၄ ရက်မှ ၁၆ ရက်နေ့အထိ ကျင်းပခဲ့သော အဆိုပါနှစ်သစ်ကူးပွဲတော်တွင် ပြည်တွင်းခရီးသွားပေါင်း ၂၁ သန်းကျော် လှည့်လည်သွားလာခဲ့ကြပြီး၊ ၎င်းအနက် နိုင်ငံခြားသားခရီးသွား အင်အားမှာလည်း သိသိသာသာ တိုးတက်လာခဲ့ခြင်းဖြစ်သည်။ ခရီးသွားလာရေးဝန်ကြီး Huot Hak က ယခုနှစ်ပွဲတော်သည် အပြုံးများနှင့် ပျော်ရွှင်မှုများဖြင့် ပြည့်နှက်နေပြီး ငြိမ်းချမ်းသာယာသော အငွေ့အသက်ကို ဖော်ဆောင်နိုင်ခဲ့ကြောင်း ပြောကြားခဲ့သည်။ခရီးသွားအများဆုံး လာရောက်သည့် နေရာများမှာ မြို့တော်ဖနွမ်းပင်၊ ကမ္ပုန်းချောင်း (Kampong Cham)၊ ပရေးဗန်း (Prey Veng) နှင့် စီယမ်ရိ (Siem Reap) တို့ဖြစ်ပြီး၊ နိုင်ငံခြားသားများသည် ခမာရိုးရာကစားနည်းများ၊ ဘာသာရေးအခမ်းအနားများနှင့် "Sankranta" ပွဲတော်များတွင် စိတ်ဝင်တစား ပါဝင်ဆင်နွှဲခဲ့ကြကြောင်း သိရသည်။ ဤကဲ့သို့ ခရီးသွားဦးရေ မြင့်တက်လာခြင်းသည် ကမ္ဘောဒီးယားနိုင်ငံ၏ ခရီးသွားကဏ္ဍ ပြန်လည်ဦးမော့လာမှုကို ပြသနေခြင်းဖြစ်ကြောင်း သတင်းတွင် ဖော်ပြထားသည်။