မွန်ပြည်နယ်တွင် ကတုံးပေါ်ဆိပ်ကမ်းမှ စက်သုံးဆီ ဖြန့်ဖြူးမှု ရပ်နားထားခြင်းကြောင့် ပြည်နယ်အတွင်း ဆီပြတ်လပ်မှု စတင်ဖြစ်ပေါ်နေကြောင်း သိရသည်။ စင်ကာပူမှ တင်သွင်းထားသည့် ဆီများ ရောက်ရှိထားသော်လည်း ဖြန့်ဖြူးရေးလုပ်ငန်း ရပ်တန့်နေခြင်းကြောင့် ဆိုင်များသို့ မရောက်ရှိနိုင်ဖြစ်နေသည်။
ရာဇာမင်းကုမ္ပဏီမှ ဝန်ထမ်းနှင့် အလုပ်သမား မရှိဟုဆိုကာ ဧပြီ ၁၄ ရက် ညနေပိုင်းမှစ၍ ဆီထုတ်ပေးမှု ရပ်နားထားရာ ဘောက်ဆာကားများလည်း ပြန်လှည့်ခဲ့ရကြောင်း ဆိုင်တာဝန်ရှိသူများက ပြောသည်။ ထို့ကြောင့် မော်လမြိုင်အပါအဝင် မြို့နယ်များတွင် ဆီရရှိမှု ခက်ခဲလာပြီး လောင်စာဆီမရှိမှုကြောင့် သင်္ကြန်ကာလ ရေပက်ခံကားများလည်း လျော့နည်းသွားကြောင်း သိရသည်။
ပြည်နယ်အစိုးရက 92 နှင့် 95 စက်သုံးဆီ တန်ချိန်များ ရောက်ရှိထားပြီး ဆိုင် ၁၆၇ ဆိုင်အား ပိတ်ရက်မရှိ ရောင်းချရန် ညွှန်ကြားထားသော်လည်း မြေပြင်တွင် ဖြန့်ဖြူးမှု ပြန်လည်မဖြစ်သေးသဖြင့် ဆီပြတ်လပ်မှု ဆက်လက်ဖြစ်ပေါ်နေကြောင်း သိရသည်။
