ရခိုင်-ဘင်္ဂလားဒေ့ရှ် နယ်စပ် ကုန်သွယ်ရေး သင်္ကြန်အပြီး ထူးခြားနိုင်

ရခိုင်ပြည်သူများ၏ လိုအပ်ချက်အခက်အခဲကို လျှော့ချနိုင်ရေးနှင့် နှစ်ဖက်အကျိုးစီးပွား ဖြစ်ထွန်းနိုင်ရေးအတွက် ရခိုင်-ဘင်္ဂလားဒေ့ရှ် တရားဝင်နယ်စပ်ကုန်သွယ်ရေးလုပ်ငန်း အမြန်ဆုံး အကောင်အထည်ဖော် ဆောင်ရွက်နိုင်ရေးကို ပြည်သူများက လိုလားနေကြသည်။ ရခိုင်ပြည်နယ်၊ မောင်တောမြို့နယ်ရှိ ကညင်ချောင်းစီးပွားရေးဇုန် (Kanyin Chaung Economic Zone) သည် မြန်မာ-ဘင်္ဂလားဒေ့ရှ် နှစ်နိုင်ငံ နယ်စပ်ကုန်သွယ်ရေးအတွက် အဓိကကျသော ကုန်သွယ်မှုဗဟိုဌာနတစ်ခု ဖြစ်သည်။ လက်ရှိတွင် ကညင်ချောင်းစီးပွားရေးဇုန်သည် နယ်စပ်ကုန်သွယ်ရေးကို ပြန်လည်သက်ဝင်လည်ပတ်ရန်နှင့် ဒေသခံများ၏ အခြေခံလိုအပ်ချက်အတွက် အရေးပါသော အခန်းကဏ္ဍတွင် ရှိနေသည်ဟု ဒေသခံများက ဆိုကြသည်။