MRT Orange Line မြေအောက်ရထားလမ်း တည်ဆောက်ရေးလုပ်ငန်းတွေကြောင့် Phetchaburi လမ်းပေါ်က Pratunam တံတား ကို ၂၀၂၆ ခုနှစ်၊ ဧပြီလ ၂၄ ရက် ည ၁၀ နာရီကစပြီး ၂၀၂၇ ခုနှစ်၊ ဖေဖော်ဝါရီလ ၁၁ ရက်အထိ ၂၄ နာရီပတ်လုံး ပိတ်ထားမှာဖြစ်တယ်လို့ ထိုင်းနိုင်ငံ အမြန်သယ်ယူပို့ဆောင်ရေး အာဏာပိုင်အဖွဲ့ (MRTA) က အတည်ပြုလိုက်ပါတယ်။ မြေအောက်ရထားလမ်း ဖြတ်သန်းသွားမယ့် လမ်းကြောင်းအတွက် တံတားရဲ့ တိုင်တွေနဲ့ အုတ်မြစ်တွေကို ဖယ်ရှားပြုပြင်ဖို့ လိုအပ်တာကြောင့် အခုလို ပိတ်လိုက်ရတာဖြစ်ပြီး လုပ်ငန်းပြီးစီးရင်တော့ မူလအတိုင်း ပြန်လည်တည်ဆောက်ပေးသွားမှာ ဖြစ်ပါတယ်။ တံတားပိတ်ထားမယ့် ကာလအတွင်းမှာ ယာဉ်မောင်းတွေအနေနဲ့ လမ်းဆုံက မီးပွိုင့်အတိုင်း မြေပြင်လမ်းကနေပဲ ဖြတ်သန်းသွားလာရမှာ ဖြစ်ပါတယ်။
