ဂျပန်နိုင်ငံ ကာဝါဆာကီမြို့ရှိ စတီးလ်စက်ရုံတစ်ခုတွင် မီတာ ၄၀ မြင့်သော ငြမ်းတစ်ခု ပြိုကျမှုကြောင့် အလုပ်သမား ၃ ဦး စိုးရိမ်ရသည့် အခြေအနေရှိနေ

ဂျပန်နိုင်ငံ၊ ကာနာဂါဝါခရိုင်၊ ကာဝါဆာကီမြို့ရှိ JFE Steel East Japan Works စတီးလ်စက်ရုံဝင်းအတွင်း ဧပြီလ ၇ ရက်နေ့ ညနေပိုင်းတွင် မီတာ ၄၀ ခန့် (၁၂ ထပ်တိုက်အမြင့်ခန့်) မြင့်မားသော ငြမ်းတစ်ခု ပြိုကျမှု ဖြစ်ပွားခဲ့သည်။ အဆိုပါမတော်တဆမှုသည် သင်္ဘောပေါ်မှ သံသတ္တုရိုင်းများ ချရာတွင် အသုံးပြုသည့် ကရိန်းကြီးတစ်ခုကို ဖျက်သိမ်းနေစဉ် ဖြစ်ပွားခဲ့ခြင်းဖြစ်ပြီး အလုပ်သမား ၅ ဦး ပြုတ်ကျခဲ့ကြောင်း သိရသည်။ ပြုတ်ကျသူများအနက် ၃ ဦးမှာ သတိလစ်မေ့မြောကာ စိုးရိမ်ရသည့် အခြေအနေတွင် ရှိနေပြီး ၁ ဦးမှာ သတိရလျက်ရှိကာ ကျန်အလုပ်သမား ၁ ဦးမှာမူ ပင်လယ်ထဲသို့ ပြုတ်ကျသွားသည်ဟု ယူဆရသဖြင့် ကယ်ဆယ်ရေးသမားများနှင့် ရေငုပ်သမားများက ရှာဖွေလျက်ရှိသည်။ လက်ရှိတွင် ရဲတပ်ဖွဲ့နှင့် မီးသတ်ဌာနက အဆိုပါ စက်မှုလုပ်ငန်းခွင် မတော်တဆမှု ဖြစ်ပွားရသည့် အကြောင်းရင်းကို စုံစမ်းစစ်ဆေးလျက်ရှိသည်။