ထိုင်းနိုင်ငံတောင်ပိုင်းတွင် သိုလှောင်ရုံများသို့ ပို့ဆောင်သည့် စက်သုံးဆီ လီတာ ၅၇ သန်း ပျောက်ဆုံးနေမှုအား စုံစမ်းစစ်ဆေးနေ

ထိုင်းနိုင်ငံတောင်ပိုင်း၊ ဆူရတ်ဌာနီပြည်နယ်ရှိ စက်သုံးဆီသိုလှောင်ရုံ ၆ ခုသို့ ပို့ဆောင်စဉ်အတွင်း လောင်စာဆီ လီတာ ၅၇ သန်း ပျောက်ဆုံးနေသည့် မူမမှန်မှုများကို စတင်တွေ့ရှိရကြောင်း တရားရေးဝန်ကြီး နာအိုဝါရတ်က ၂၀၂၆ ခုနှစ်၊ ဧပြီလ ၇ ရက်နေ့တွင် ထုတ်ဖော်ပြောကြားခဲ့သည်။ ဝန်ကြီး၏ ပြောပြချက်အရ ရေနံတင်ကားများဖြင့် အကြိမ် ၉၆ ကြိမ်အတွင်း စုစုပေါင်း လီတာ ၂၁၇ သန်း ပို့ဆောင်ခဲ့သော်လည်း သတ်မှတ်နေရာများသို့ လီတာ သန်း ၁၆၀ သာ ရောက်ရှိခဲ့သဖြင့် ကျန်ရှိနေသည့် ပမာဏမှာ ပျောက်ဆုံးနေခြင်း ဖြစ်သည်။အဆိုပါဖြစ်စဉ်နှင့် ပတ်သက်၍ လောင်စာဆီများအား တရားမဝင် ဝယ်ယူစုဆောင်းနေသူများကို အရေးပေါ်နှိမ်နင်းသွားမည်ဟု ဝန်ကြီးချုပ် အနုတင်က ကြေညာထားပြီး၊ အထူးစုံစမ်းစစ်ဆေးရေးဌာန (DSI) က သက်ဆိုင်ရာ စာရွက်စာတမ်းများကို ရယူကာ စစ်ဆေးမှုများ စတင်နေပြီဖြစ်သည်။ စုံစမ်းစစ်ဆေးမှု ပထမအဆင့်တွင် ဆီဆိုင်များ၊ ရဲတပ်ဖွဲ့ဝင်များနှင့် ဒေသဆိုင်ရာအရာရှိများကို စစ်ဆေးသွားမည်ဖြစ်ပြီး၊ ဒုတိယအဆင့်အနေဖြင့် ရေနံသန့်စင်စက်ရုံများမှ လက်လီအရောင်းဆိုင်များအထိ ထောက်ပံ့ရေးကွင်းဆက်တစ်ခုလုံးကို ခြေရာခံသွားမည်ဖြစ်သည်။