မြန်မာနိုင်ငံတွင် ဓာတ်ဆီ ရက် ၄၀ နှင့် ဒီဇယ် ရက် ၅၀ စာ ဖူလုံမှုရှိကြောင်း စွမ်းအင်ဝန်ကြီးဌာန ထုတ်ပြန်

မြန်မာနိုင်ငံတွင် စက်သုံးဆီဖူလုံမှုအနေဖြင့် ဓာတ်ဆီ ရက် ၄၀ စာနှင့် ဒီဇယ် ၅၀ ရက်စာခန့် လက်ကျန်ရှိနေပြီး၊ ယခု ဧပြီလအတွင်း စက်သုံးဆီတင်သင်္ဘော ၂၆ စင်း ထပ်မံဝင်ရောက်ရန် စီမံထားရှိကြောင်း စွမ်းအင်ဝန်ကြီးဌာနက ၂၀၂၆ ခုနှစ်၊ ဧပြီလ ၆ ရက်နေ့တွင် အသိပေးထုတ်ပြန်ခဲ့သည်။ ဝန်ကြီးဌာန၏ ထုတ်ပြန်ချက်အရ ဒစ်ဂျစ်တယ်နည်းပညာသုံး QR Code စနစ်ဖြင့် ကြပ်မတ်ထိန်းကျောင်းမှုကြောင့် နေ့စဉ်စက်သုံးဆီသုံးစွဲမှုနှုန်းမှာ ၂၉ ရာခိုင်နှုန်းခန့် ကျဆင်းသွားပြီး တစ်ရက်လျှင် အမေရိကန်ဒေါ်လာ ၆ သန်းခန့် သက်သာစေသည့်အပြင် အရံဆီသိုလှောင်မှုကိုလည်း ၁၀ ရက်စာ ပိုမိုစုဆောင်းလာနိုင်ကြောင်း သိရသည်။ပြည်သူများအနေဖြင့် အခြေအမြစ်မရှိသော သတင်းအမှားများကို မယုံကြည်ဘဲ ဝန်ကြီးဌာန၏ ထုတ်ပြန်ချက်များကိုသာ နားထောင်ရန်နှင့် စက်သုံးဆီဝယ်ယူရာတွင် သတ်မှတ်ထားသော စည်းကမ်းချက်များအတိုင်း ပူးပေါင်းဆောင်ရွက်ကြရန် တိုက်တွန်းထားသည်။ ထို့ပြင် စက်သုံးဆီအရောင်းဆိုင်များအနေဖြင့်လည်း အရေးပေါ်ဆီဖြည့်တင်းခွင့်များ ရရှိနေသည့်အတွက် စိုးရိမ်ကြောင့်ကြမှုမရှိဘဲ ပုံမှန်ရောင်းချပေးရန်နှင့် အခက်အခဲရှိပါက Call Center များသို့ ဆက်သွယ်နိုင်ကြောင်း သိရှိရပါသည်။