ဘန်ကောက်မြို့၏ အပူချိန်အညွှန်းကိန်း (Heat Index) အန္တရာယ်ရှိအဆင့်သို့ ရောက်ရှိနေကြောင်း သတိပေး

ဘန်ကောက်မြို့ပြအုပ်ချုပ်ရေးအဖွဲ့ (BMA) က ယနေ့ ၂၀၂၆ ခုနှစ်၊ ဧပြီလ ၆ ရက် (တနင်္လာနေ့) တွင် မြို့တော်၏ အပူချိန်အညွှန်းကိန်းမှာ ၄၂ ဒီဂရီစင်တီဂရိတ်မှ ၅၁.၉ ဒီဂရီစင်တီဂရိတ်အတွင်းရှိနေပြီး "အန္တရာယ်ရှိသောအဆင့်" သို့ ရောက်ရှိနေကြောင်း သတိပေးချက်ထုတ်ပြန်ခဲ့သည်။ လေထုစိုထိုင်းဆ မြင့်မားမှုကြောင့် ခန္ဓာကိုယ်က အမှန်တကယ်ခံစားရသည့် အပူချိန်မှာ ၅၂ ဒီဂရီစင်တီဂရိတ်ထက်ကျော်လွန်သည့် "အလွန်အန္တရာယ်ရှိသောအဆင့်" သို့ပင် ရောက်ရှိသွားနိုင်သည့် အခြေအနေဖြစ်နေသည်။အပူလျှပ်ခြင်း (Heatstroke) နှင့် အပူဒဏ်ကြောင့် နုံးချိခြင်းများ မဖြစ်စေရန်အတွက် အပူဆုံးအချိန်ဖြစ်သည့် နံနက် ၁၁ နာရီမှ နေ့လယ် ၃ နာရီအတွင်း အပြင်ထွက်ခြင်းကို ရှောင်ကြဉ်ရန်နှင့် ရေကို ပုံမှန်သောက်ပေးရန် အာဏာပိုင်များက တိုက်တွန်းထားသည်။ အထူးသဖြင့် ကလေးငယ်များ၊ သက်ကြီးရွယ်အိုများနှင့် နာတာရှည်ရောဂါရှိသူများအနေဖြင့် အပြင်ထွက်ခြင်းကို လုံးဝရှောင်ကြဉ်သင့်ပြီး မူးဝေခြင်း၊ နှလုံးခုန်မြန်ခြင်းများ ခံစားရပါက အေးမြသည့်နေရာတွင် အမြန်ဆုံးအနားယူသင့်ကြောင်း သိရှိရပါသည်။