၂၀၂၅ ခုနှစ်အတွက် ဗီယက်နမ်နိုင်ငံ၏ လူနေမှုစရိတ်အကြီးဆုံးမြို့အဖြစ် ဟနွိုင်းက ထိပ်ဆုံးမှ ဆက်လက်ရပ်တည်နေ

ဗီယက်နမ်နိုင်ငံ အထွေထွေစာရင်းအင်းရုံး (GSO) က ဧပြီလ ၄ ရက်နေ့တွင် ထုတ်ပြန်သည့် ၂၀၂၅ ခုနှစ်အတွက် ဒေသအလိုက် လူနေမှုစရိတ်ညွှန်းကိန်း (SCOLI) အရ မြို့တော်ဟနွိုင်း (Hanoi) သည် နိုင်ငံအတွင်း လူနေမှုစရိတ်အမြင့်မားဆုံးမြို့အဖြစ် ၅ နှစ်ဆက်တိုက် ရပ်တည်နေပြီး၊ မဲခေါင်မြစ်ဝကျွန်းပေါ်ဒေသရှိ ဗင်းလောင်း (Vinh Long) ခရိုင်မှာမူ လူနေမှုစရိတ် အသက်သာဆုံးဒေသဖြစ်ကြောင်း သိရသည်။

ဟနွိုင်းမြို့၏ အသုံးစရိတ်ကို အခြေခံ ၁၀၀ ရာခိုင်နှုန်းအဖြစ် သတ်မှတ်ပါက ဗင်းလောင်းခရိုင်၏ စရိတ်မှာ ၉၁.၄၇ ရာခိုင်နှုန်းသာရှိသဖြင့် ဒေသနှစ်ခုအကြား ၈.၅၃ ရာခိုင်နှုန်းခန့် ကွာဟချက်ရှိနေပြီး၊ ဒေသအလိုက်ကြည့်ပါက မြစ်နီမြစ်ဝကျွန်းပေါ်ဒေသ (Red River Delta) သည် စရိတ်အကြီးဆုံးဖြစ်ကာ မဲခေါင်မြစ်ဝကျွန်းပေါ်ဒေသမှာ စရိတ်အသက်သာဆုံးဖြစ်သည်။ စရိတ်သက်သာသည့် ဒေသများတွင် အခြေခံစားသောက်ကုန်၊ အိမ်ရာနှင့် သယ်ယူပို့ဆောင်ရေးစရိတ်များမှာ ဟနွိုင်းနှင့်နှိုင်းယှဉ်ပါက သိသိသာသာ လျော့နည်းကြောင်း အစီရင်ခံစာတွင် ဖော်ပြထားသည်။