ဆီးရီးယားနိုင်ငံ၊ ဒမတ်စကတ်မြို့ရှိ ယူအေအီးသံရုံးနှင့် သံရုံးအကြီးအကဲ၏ နေအိမ်တို့အား ဆူပူအကြမ်းဖက်သူများက ဝင်ရောက်စီးနင်းရန် ကြိုးပမ်းခြင်းနှင့် ဖျက်ဆီးခြင်းများ ပြုလုပ်ခဲ့မှုအပေါ် ယူအေအီးနိုင်ငံခြားရေးဝန်ကြီးဌာနက ဧပြီလ ၄ ရက်နေ့တွင် ပြင်းထန်စွာ ရှုတ်ချလိုက်သည်။ အဆိုပါ တိုက်ခိုက်မှုတွင် နိုင်ငံတော်အမှတ်အသားများကိုပါ ပစ်မှတ်ထား စော်ကားခဲ့သည့်အတွက် ယူအေအီးအနေဖြင့် လုံးဝလက်မခံနိုင်ကြောင်းနှင့် သံတမန်အဆောက်အအုံများနှင့် ဝန်ထမ်းများကို ကာကွယ်ပေးရန်မှာ ဗီယင်နာကွန်ဗင်းရှင်း (Vienna Convention) အရ လက်ခံထားသည့် နိုင်ငံ၏ တာဝန်သာဖြစ်ကြောင်း အလေးအနက် ပြောကြားခဲ့သည်။
ယူအေအီးအစိုးရသည် ဆီးရီးယားအစိုးရအနေဖြင့် ဤဖြစ်ရပ်ကို အမြန်ဆုံးစုံစမ်းစစ်ဆေးရန်၊ တရားခံများကို ဖော်ထုတ်အရေးယူရန်နှင့် နောင်တွင် ယခုကဲ့သို့ ထပ်မံမဖြစ်ပွားစေရန်အတွက် လုံခြုံရေးအစီအမံများကို တိုးမြှင့်ဆောင်ရွက်ပေးရန် တောင်းဆိုထားကြောင်း သိရသည်။ ဆိုရှယ်မီဒီယာများတွင် ပျံ့နှံ့နေသည့် ဗီဒီယိုများအရ သံရုံးရှေ့တွင် ဆန္ဒပြမှုများ ရှိခဲ့သော်လည်း အဆိုပါ ဖြစ်ရပ်ဖြစ်ပွားရသည့် အဓိကအကြောင်းရင်းကိုမူ ရှင်းလင်းစွာ မသိရသေးပေ။
