သင်္ကြန်ရုံးပိတ်ရက်ကာလအတွင်း သွင်းကုန်/ပို့ကုန်လုပ်ငန်းများကို အကောက်ခွန်ဦးစီးဌာနက ပိတ်ရက်မရှိ ဆောင်ရွက်ပေးမည်

၂၀၂၆ ခုနှစ် သင်္ကြန်ရုံးပိတ်ရက်ကာလအတွင်း နိုင်ငံတော်လိုအပ်ချက်အရ အရေးကြီးကုန်ပစ္စည်းများ တင်သွင်း၊ တင်ပို့နိုင်ရေးအတွက် အကောက်ခွန်ဦးစီးဌာနက ဧပြီလ ၁၁ ရက်မှ ၁၅ ရက်အထိ (မြန်မာနှစ်ဆန်းတစ်ရက်နေ့မှအပ) ရုံးချိန်ပြည့် ဝန်ဆောင်မှုပေးသွားမည်ဖြစ်ကြောင်း ၂၀၂၆ ခုနှစ်၊ ဧပြီလ ၄ ရက်နေ့တွင် ထုတ်ပြန်ကြေညာခဲ့သည်။ အပြည်ပြည်ဆိုင်ရာ ဆိပ်ကမ်းများနှင့် လေကြောင်းခရီးစဉ်များမှတစ်ဆင့် ကုန်စည်စီးဆင်းမှု မပြတ်တောက်စေရန် အချိန်ပိုလုပ်ငန်းဆောင်ရွက်လိုသည့် ကုမ္ပဏီများသည် ဧပြီလ ၁၀ ရက်၊ နေ့လယ် ၂ နာရီနောက်ဆုံးထား၍ ကြိုတင်လျှောက်ထားရမည်ဖြစ်ပြီး၊ ကျသင့်ခွန်အတွက် Deposit ငွေ လုံလောက်စွာ ထားရှိရမည်ဖြစ်သည်။ အထူးသဖြင့် Asia World ဆိပ်ကမ်းတွင် အဆိုင်း ၃ ဆိုင်းဖြင့် ဆောင်ရွက်ပေးသွားမည်ဖြစ်သလို၊ နယ်စပ်ကုန်သွယ်ရေးစခန်းများနှင့် လမ်းကြောင်းပေါ်ရှိ အကောက်ခွန်ရုံးများတွင်လည်း သင်္ကြန်ကာလအတွင်း ပိတ်ရက်မရှိ လုပ်ငန်းများ လည်ပတ်ဆောင်ရွက်ပေးသွားမည်ဖြစ်ကြောင်း သိရှိရပါသည်။