ဗီယက်နမ်နိုင်ငံတွင် ကလေးသူငယ်များအား ခေါင်းပုံဖြတ်အလွဲသုံးစားလုပ်ပါက အမေရိကန်ဒေါ်လာ ၁,၈၉၀ အထိ ဒဏ်ရိုက်မည့် ဥပဒေသစ်ထုတ်ပြန်

ဗီယက်နမ်အစိုးရသည် ကလေးသူငယ်စောင့်ရှောက်ရေးနှင့် လူမှုကာကွယ်စောင့်ရှောက်ရေးဆိုင်ရာ ချိုးဖောက်မှုများကို ထိရောက်စွာအရေးယူရန် အမိန့်ဒီကရီအမှတ် ၉၈ (Decree 98) ကို မတ်လ ၃၁ ရက်နေ့တွင် ထုတ်ပြန်ခဲ့ပြီး၊ လာမည့် မေလ ၁၆ ရက်နေ့မှစတင်ကာ အာဏာတည်တော့မည်ဖြစ်သည်။ အဆိုပါ ဥပဒေသစ်အရ ကလေးသူငယ်များကို ၎င်းတို့၏ ခန္ဓာကိုယ်ကြံ့ခိုင်မှုထက်ကျော်လွန်သော အိမ်မှုကိစ္စများခိုင်းစေခြင်း၊ ပညာသင်ကြားချိန်နှင့် အနားယူချိန်ကို ထိခိုက်စေခြင်းတို့အတွက် ဗီယက်နမ်ဒေါင် ၂၀ သန်းမှ ၃၀ သန်း (ဒေါ်လာ ၇၆၀ မှ ၁,၁၄၀ ခန့်) အထိ ဒဏ်ရိုက်မည်ဖြစ်ကာ၊ ကလေးများကို တောင်းရမ်းခိုင်းခြင်း သို့မဟုတ် အခြားသူများထံ တောင်းရမ်းရန်အတွက် ငှားရမ်းခြင်းများ ပြုလုပ်ပါက ဒေါင် ၄၀ သန်း (ဒေါ်လာ ၁,၅၁၅ ခန့်) အထိ ဒဏ်ရိုက်ခံရမည်ဖြစ်သည်။ထို့အပြင် ကလေးငယ်များ၏ ကိုယ်ရေးအချက်အလက်နှင့် ပုံရိပ်များကို အကျိုးအမြတ်အတွက်ဖြစ်စေ၊ ထိခိုက်နစ်နာစေမည့် အကြောင်းအရာများ ဖန်တီးရန်ဖြစ်စေ အလွဲသုံးစားပြုလုပ်ပါက အမြင့်ဆုံးဒဏ်ငွေအဖြစ် ဒေါင် ၅၀ သန်း (ဒေါ်လာ ၁,၈၉၀ ခန့်) အထိ သတ်မှတ်ထားပြီး၊ အဖွဲ့အစည်းများအနေဖြင့် ကျူးလွန်ပါက ဒဏ်ငွေနှစ်ဆ ပေးဆောင်ရမည်ဖြစ်သည်။ ယခုဒီကရီတွင် ကလေးများသာမက သက်ကြီးရွယ်အိုနှင့် မသန်စွမ်းသူများကို ပြုစုစောင့်ရှောက်သူများအနေဖြင့် ၎င်းတို့၏ အခန်းကဏ္ဍကို အလွဲသုံးစားလုပ်၍ ကိုယ်ကျိုးရှာခြင်း သို့မဟုတ် အန္တရာယ်ရှိသော အလုပ်များ ခိုင်းစေခြင်းများကိုလည်း တားမြစ်ပိတ်ပင်ထားကြောင်း သိရသည်။