ကမ္ဘောဒီးယားနိုင်ငံ၊ဘတ်သမ်ဘောင်းမြို့တွင် လူ ၆ ဦးသေဆုံးစေခဲ့သော ယာဉ်တိုက်မှုအတွက် တရားခံဖြစ်သူက ၎င်းမောင်းနှင်ခဲ့ကြောင်း ဝန်ခံထွက်ဆို

ကမ္ဘောဒီးယားနိုင်ငံ၊ ဘတ်သမ်ဘောင်း (Battambang) ခရိုင်တွင် လူ ၆ ဦး (ကိုယ်ဝန်ဆောင်မိခင်နှင့် ဗိုက်ထဲမှကလေးအပါအဝင်) သေဆုံးခဲ့ရသည့် လူသေဆုံးမှုဖြစ်ပွားပြီးနောက် ထွက်ပြေးတိမ်းရှောင်နေသော တရားခံ Siv Cheyseth သည် ဧပြီလ ၁ ရက်နေ့ မွန်းလွဲပိုင်းတွင် ရဲစခန်းသို့ လာရောက်အဖမ်းခံခဲ့ပြီး ၎င်းကိုယ်တိုင် ကားမောင်းနှင်ခဲ့ခြင်းဖြစ်ကြောင်း ဝန်ခံခဲ့သည်။ တရားခံသည် ဘန်တေးမိချေး (Banteay Meanchey) ခရိုင် ဒုတိယရဲမင်းကြီး၏ သားဖြစ်နေသဖြင့် အမှုမှန်ပေါ်ပေါက်ရန်နှင့် တရားဥပဒေအတိုင်း အရေးယူရန် ဝန်ကြီးချုပ်ကိုယ်တိုင် ညွှန်ကြားခဲ့ရသော အမှုတစ်ခုဖြစ်သည်။မတ်လ ၂၇ ရက်နေ့က အမျိုးသားလမ်းမကြီးအမှတ် ၅ ပေါ်တွင် ဖြစ်ပွားခဲ့သော အဆိုပါယာဉ်တိုက်မှုတွင် မိသားစုဝင်များ လိုက်ပါလာသည့် ဆိုင်ကယ်နှစ်စီးကို ဇိမ်ခံကားဖြင့် အရှိန်ပြင်းစွာ တိုက်မိခဲ့ခြင်းဖြစ်ပြီး၊ တရားခံမှာ အစောပိုင်းက ရဲစခန်းသို့ လာရောက်ရန် ပျက်ကွက်ခဲ့သော်လည်း ယနေ့ မွန်းလွဲ ၃ နာရီ ၄၅ မိနစ်တွင် မိသားစုဝင်များနှင့်အတူ လာရောက်အဖမ်းခံခဲ့ကာ ၎င်းတစ်ဦးတည်းသာ ကားမောင်းနှင်ခဲ့ခြင်းဖြစ်ကြောင်း ထွက်ဆိုခဲ့သဖြင့် ဥပဒေအရ ဆက်လက်အရေးယူဆောင်ရွက်နေပြီဖြစ်ကြောင်း သိရသည်။