စင်ကာပူအစိုးရသည် ပြည်တွင်းနိုင်ငံရေးတွင် နိုင်ငံခြားသားများ ဝင်ရောက်စွက်ဖက်မှုကို လုံးဝလက်ခံမည်မဟုတ်ကြောင်း (Zero-Tolerance) မတ်လ ၂၈ ရက်နေ့တွင် ထပ်လောင်းအတည်ပြုခဲ့ပြီး၊ ပြည်တွင်း၌ နိုင်ငံရေးလှုပ်ရှားမှုများ ပြုလုပ်ခဲ့သည့် မလေးရှားနိုင်ငံသား ရှေ့နေနှင့် တက်ကြွလှုပ်ရှားသူ Fadiah Nadwa Fikri ကို ပြည်နှင်ဒဏ်ပေးကာ နောက်နောင်တွင်လည်း စင်ကာပူသို့ ဝင်ရောက်ခွင့် ပိတ်ပင်လိုက်ကြောင်း သိရသည်။
စင်ကာပူပြည်ထဲရေးဝန်ကြီးဌာန (MHA) ၏ ထုတ်ပြန်ချက်အရ Fadiah သည် ပြီးခဲ့သည့် ဇန်နဝါရီလက စင်ကာပူအမျိုးသားတက္ကသိုလ် (NUS) မှ ပါရဂူဘွဲ့ (PhD) ရရှိခဲ့သူဖြစ်ပြီး၊ ၎င်းသည် စင်ကာပူလူငယ်များအား အစိုးရကို ဆန့်ကျင်ကန့်ကွက်သည့် နည်းလမ်းများ ကျင့်သုံးလာစေရန် လှုံ့ဆော်စည်းရုံးခဲ့ကြောင်း ဖော်ပြထားသည်။ ၎င်းအား မတ်လ ၂၂ ရက်နေ့တွင် စင်ကာပူသို့ ပြန်လည်ဝင်ရောက်ရန် ကြိုးပမ်းစဉ် လဝကက တားဆီးခဲ့ခြင်းဖြစ်ပြီး၊ စင်ကာပူအနေဖြင့် နိုင်ငံခြားသားများ၏ ဥပဒေမဲ့ဆန္ဒပြမှုများနှင့် ပြည်တွင်းရေးနှောင့်ယှက်မှုများကို ပြင်းပြင်းထန်ထန် အရေးယူသွားမည်ဖြစ်ကြောင်း သတိပေးထားပါသည်။
