ကမ္ဘောဒီးယားတွင် စွမ်းအင်အကျပ်အတည်းကြောင့် အစိုးရဌာနများ၌ စက်သုံးဆီသုံးစွဲမှု ကန့်သတ်ရန် ညွှန်ကြား

ကမ္ဘာ့စက်သုံးဆီဈေးနှုန်းများ အဆမတန်မြင့်တက်လာမှုနှင့်အတူ စွမ်းအင်အကျပ်အတည်း ကြုံတွေ့နေရသဖြင့် ကမ္ဘောဒီးယားအစိုးရသည် ဝန်ကြီးဌာနများနှင့် အစိုးရအဖွဲ့အစည်းများအားလုံးတွင် စက်သုံးဆီနှင့် လျှပ်စစ်ဓာတ်အား ချွေတာသုံးစွဲကြရန် အရေးပေါ်ညွှန်ကြားချက်များ ထုတ်ပြန်လိုက်ပါသည်။အဆိုပါညွှန်ကြားချက်အရ လွှတ်တော်၊ ဝန်ကြီးဌာနများနှင့် ဖွဲ့စည်းပုံအခြေခံဥပဒေဆိုင်ရာ ကောင်စီတို့အပါအဝင် အစိုးရဌာနအားလုံးသည် စက်သုံးဆီနှင့် ချောဆီအသုံးစရိတ်ဘတ်ဂျက်၏ ၃၀ ရာခိုင်နှုန်း ကို လျှော့ချရမည်ဖြစ်ပြီး၊ မလိုအပ်ဘဲ ပြည်တွင်းပြည်ပ ခရီးသွားလာမှုများကိုလည်း ရပ်ဆိုင်းထားရန် ပါဝင်သည်။ ပြည်ထဲရေးဝန်ကြီးဌာနက လာမည့်နှစ်လအတွင်း စွမ်းအင်သုံးစွဲမှုကို ၅၀ ရာခိုင်နှုန်း အထိ လျှော့ချရန် ရည်မှန်းထားသလို၊ ပညာရေးဝန်ကြီးဌာနကလည်း စာသင်ကျောင်းများတွင် သဘာဝအလင်းရောင်ကို ပိုမိုအသုံးပြုရန်နှင့် မလိုအပ်သော လျှပ်စစ်ပစ္စည်းများကို ပိတ်ထားရန် ညွှန်ကြားထားသည်။ အနောက်အာရှပဋိပက္ခကြောင့် စက်သုံးဆီဈေးနှုန်း ၆၈ ရာခိုင်နှုန်းခန့် မြင့်တက်လာမှုအပေါ် တုံ့ပြန်ရန်နှင့် နိုင်ငံ၏ ဘဏ္ဍာရေးတည်ငြိမ်မှုကို ထိန်းသိမ်းရန် ယခုကဲ့သို့ အစီအမံများကို လုပ်ဆောင်ခြင်းဖြစ်ကြောင်း သတင်းတွင် ဖော်ပြထားပါသည်။