မလေးရှားနိုင်ငံတစ်ဝန်းရှိ အမြန်လမ်းမကြီးများတွင် အီဒယ်လ်ဖီထရီ (Aidilfitri) ရုံးပိတ်ရက်အပြီး ယာဉ်ကြောပိတ်ဆို့မှုများ ဖြစ်ပေါ်နေ

မလေးရှားတွင် အီဒယ်လ်ဖီထရီ ရုံးပိတ်ရက်များအပြီး နေရပ်ပြန်ကြသူများသည် ကွာလာလမ်ပူမြို့တော်သို့ ပြန်လည်ဝင်ရောက်လာကြသဖြင့် တနင်္လာနေ့ (မတ်လ ၂၃ ရက်၊ ၂၀၂၆) ညနေပိုင်းတွင် နိုင်ငံတစ်ဝန်းရှိ အဓိကအမြန်လမ်းမကြီးများ၌ ယာဉ်ကြောများ အလွန်အမင်း ပိတ်ဆို့လျက်ရှိကြောင်း မလေးရှားအမြန်လမ်းအာဏာပိုင်အဖွဲ့ (LLM) က ထုတ်ပြန်ထားပါသည်။မနက်ဖြန်တွင် လုပ်ငန်းခွင်များ ပြန်လည်စတင်တော့မည်ဖြစ်ရာ ယနေ့ညနေ ၅ နာရီခန့်မှစတင်၍ မြောက်-တောင် အမြန်လမ်းမကြီး (PLUS) ၏ မြောက်ဘက်နှင့် တောင်ဘက် လမ်းပိုင်းနှစ်ခုလုံးတွင် ယာဉ်ကြောကျပ်တည်းမှုများ စတင်ဖြစ်ပေါ်ခဲ့ခြင်းဖြစ်သည်။မြောက်ဘက်လမ်းပိုင်းရှိ Sungkai မှ Bidor ၊ Bidor မှ Tapah နှင့် Gua Tempurung မှ Gopeng အထိ နေရာအနှံ့အပြားတွင် ယာဉ်ကြောပိတ်ဆို့နေပြီး၊ အထူးသဖြင့် Kuala Kangsar နှင့် Menora ဥမင်လိုဏ်ခေါင်းကြားတွင် ယာဉ်များမှာ မိနစ် ၃၀ ခန့်အထိ ကြန့်ကြာလျက်ရှိသည်။ တောင်ဘက်ပိုင်းတွင်လည်း ဂျဟိုး (Johor) ပြည်နယ်ရှိ Machap မှ Yong Peng အထိ ကီလိုမီတာ ၂၀ ခန့်အထိ ယာဉ်တန်းကြီး ရှည်လျားနေသည်။ ထို့အပြင် ကွာလာလမ်ပူ-ကာရက် (KLK) အမြန်လမ်းမကြီးတွင်လည်း မြို့တော်သို့ဝင်မည့်ဘက်၌ ကီလိုမီတာ ၁၅ ကီလိုမီတာခန့် ယာဉ်များ ပိတ်ဆို့နေကာ၊ ယနေ့ညဉ့်နက်ပိုင်းအထိ ယာဉ်အစီးရေ ၂.၉ သန်းခန့် မြို့တော်အတွင်းသို့ ဝင်ရောက်လာနိုင်မည်ဟု ခန့်မှန်းထားသည်။ အာဏာပိုင်များက ယာဉ်ကြောချောမွေ့စေရန်အတွက် Smart Lane ၃၀ ခုကို ဖွင့်လှစ်ပေးထားပြီး၊ ယာဉ်မောင်းများအနေဖြင့် စိတ်ရှည်သည်းခံစွာ မောင်းနှင်ကြရန်နှင့် မိမိတို့၏ Touch 'n Go ကတ်များတွင် ငွေလက်ကျန်လုံလောက်စွာ ရှိ၊ မရှိ စစ်ဆေးကြရန် တိုက်တွန်းထားကြောင်း သတင်းတွင် ဖော်ပြထားသည်။