ဧရာဝတီတိုင်းအတွင်းမှာ စပါး တင်းတရာကို ကျပ် ၁၁ သိန်းဝန်းကျင်ထိ စျေးကျလာခဲ့

ဧရာဝတီတိုင်းအတွင်းမှာ နွေစပါးတွေ ပေါ်လာချိန် စပါးစျေး တဖြည်းဖြည်းကျလာခဲ့ပြီး အခုရက်ပိုင်းမှာ တင်းတရာကို ကျပ် ၁၁ သိန်းဝန်းကျင်ထိ စျေးထပ်ကျလာခဲ့တာ ဖြစ်ပါတယ်။နွေစပါးအဖြစ် အစိုက်များကြတဲ့ ရက် ၉၀ ၊ GW-11 ၊ နယူးဧရာ ၊ ဗျောသုခ စတဲ့နွေစပါးအမျိုးအစားတွေ စျေးကျနေတာဖြစ်ပြီး အခုတပတ်အတွင်းမှာပဲ ကျပ် ၁၂ သိန်းဝန်းကျင်ကနေ ၁၁ သိန်းလောက်ထိ ထိုးကျသွားခဲ့တာလို့ ဆိုပါတယ်။အဲဒီစပါးတွေဟာ နွေစပါးပေါ်ခါစမှာ တင်းတရာကို ကျပ် ၁၄ သိန်းဝန်းကျင်ထိ စျေးရှိခဲ့ရာကနေ နွေစပါးလှိုင်လာ ချိန် တဖြေးဖြေး စျေးကျသွားခဲ့တာဖြစ်ပါတယ်။ ဆင်းသုခ၊ ဧည့်မထ စတဲ့စပါးတွေကတော့ တင်းတရာကို ကျပ် ၁၄ သိန်းနီးပါးစျေးရှိနေတယ်လို့ ဆိုပါတယ်။