ဒူဘိုင်းရွှေဈေးကွက်တွင် ရွှေဈေးနှုန်းကို ပို့ဆောင်ရေးအခက်အခဲကြောင့် လျှော့ဈေးဖြင့် ရောင်းချနေရ

အရှေ့အလယ်ပိုင်းဒေသတွင် အမေရိကန်၊ အစ္စရေးနှင့် အီရန်တို့ကြား စစ်ရေးတင်းမာမှုများ အရှိန်မြင့်လာခြင်းကြောင့် လေကြောင်းလိုင်းများ ဖျက်သိမ်းခြင်းနှင့် လေကြောင်းပိုင်နက် ပိတ်ဆို့မှုများ ဖြစ်ပေါ်လျက်ရှိရာ ဒူဘိုင်းရွှေဈေးကွက်အတွင်း ရွှေတင်ပို့မှုများ ရပ်တန့်နေသဖြင့် ကုန်သည်များမှာ သိုလှောင်စရိတ်နှင့် အာမခံစရိတ် ဝန်ထုပ်ဝန်ပိုးကို လျှော့ချရန်အတွက် ရွှေကို လျှော့ဈေးများဖြင့် ရောင်းချနေကြကြောင်း သတင်းထုတ်ပြန်ခဲ့ပါသည်။ ဒူဘိုင်းရှိ ရွှေကုန်သည်များသည် လန်ဒန်စံနှုန်းထက် တစ်အောင်စလျှင် ဒေါ်လာ ၃၀ ခန့် (သို့မဟုတ် AED ၁၁၀ ဝန်းကျင်) အထိ လျှော့ချရောင်းချနေရပြီး၊ ဤသည်မှာ ရွှေတန်ဖိုး ကျဆင်းခြင်းကြောင့် မဟုတ်ဘဲ သယ်ယူပို့ဆောင်ရေး လမ်းကြောင်းများ ပြတ်တောက်နေမှုကြောင့် ဖြစ်ပေါ်လာသည့် ထူးခြားသော ဈေးကွက်အခြေအနေ ဖြစ်သည်။ နိုင်ငံတကာဈေးကွက်တွင်မူ ရွှေသည် ဘေးကင်းသော ရင်းနှီးမြှုပ်နှံမှု (Safe-haven asset) အဖြစ် ဝယ်လိုအား မြင့်တက်နေဆဲဖြစ်ပြီး၊ ဒူဘိုင်းရှိ အခြေအနေသည် လေကြောင်းခရီးစဉ်များ ပုံမှန်ပြန်ဖြစ်လာမှသာ ပြန်လည်တည်ငြိမ်လာဖွယ်ရှိကြောင်းနှင့် လက်ရှိတွင် ရင်းနှီးမြှုပ်နှံသူများအနေဖြင့် ဈေးကွက်မတည်ငြိမ်မှုကို စောင့်ကြည့်နေကြကြောင်း သတင်းတွင် ဖော်ပြထားသည်။