တောင်ကြီးမြို့နယ်တရားသူကြီး စိုင်းအောင်မြင့်ဦးနှင့် အဖွဲ့အပေါ် လာဘ်ပေးလာဘ်ယူမှု စွပ်စွဲချက်များ ထွက်ပေါ်

၂၀၂၆ ခုနှစ်၊ မတ်လ ၂၂ ရက် သတင်းများအရ ရှမ်းပြည်နယ်၊ တောင်ကြီးမြို့နယ်တရားသူကြီး စိုင်းအောင်မြင့်ဦးသည် တရားမဝင်ကုန်သွယ်မှုဖြင့် ဖမ်းဆီးထားသည့် သွင်းကုန်အမှုများကို စီရင်ရာတွင် ကုန်ကားတစ်စီးလျှင် ငွေကျပ် သိန်း ၂၀၀ မှ ၃၀၀ အထိ လာဘ်ငွေတောင်းခံနေကြောင်း တရားရေးအသိုင်းအဝိုင်းထံမှ သိရသည်။ ငွေမပေးနိုင်သည့် ကုန်သည်များကို အမြင့်ဆုံးထောင်ဒဏ်ချမှတ်ခြင်းနှင့် အမှုအချိန်ဆွဲခြင်းများ ပြုလုပ်သဖြင့် ကုန်သည်များမှာ ကုန်ပစ္စည်းများ ပုပ်သိုးဆုံးရှုံးမှုနှင့် ရင်ဆိုင်နေရပြီး၊ ငွေပေးနိုင်သူများကိုမူ လွှတ်ပေးနေကြောင်း စွပ်စွဲချက်များ ရှိနေသည်။ထို့ပြင် သိမ်းဆည်းရမိသည့်ကုန်စည်များကို လေလံတင်ရာတွင်လည်း အများပြည်သူအား အသိပေးခြင်းမရှိဘဲ ၎င်း၏ဆွေမျိုးများကိုသာ လက်သိပ်ထိုး လေလံဆွဲခွင့်ပြုခဲ့ကြောင်း သိရသည်။ ယင်းသို့ လာဘ်ငွေတောင်းခံရာတွင် တရားရုံးစာရေး အောင်ဟိန်းဦးက အဓိက ကူညီပေးနေပြီး ပြည်နယ်တရားသူကြီးချုပ်ထံ ဝေစုခွဲပေးရမည်ဟု အကြောင်းပြကာ ငွေပိုမိုတောင်းခံလေ့ရှိကြောင်း မဲခေါင်သတင်းတွင် ဖော်ပြထားပါသည်။ တရားသူကြီး စိုင်းအောင်မြင့်ဦးသည် တရားရုံးအတွင်း အရက်သေစာသောက်စားကာ ရဲတပ်ဖွဲ့ဝင်များကို ဆဲဆိုကြိမ်းမောင်းမှုများကြောင့် ရဲများနှင့်လည်း အဆင်မပြေမှုများ ရှိနေကြောင်း သိရှိရပါသည်။