ထိုင်းနိုင်ငံတွင် စက်သုံးဆီနှင့် သယ်ယူပို့ဆောင်ရေးစရိတ် မြင့်တက်မှုကြောင့် အခြေခံလူသုံးကုန်ဈေးနှုန်းများ လိုက်ပါမြင့်တက်လာ

ထိုင်းနိုင်ငံတွင် စက်သုံးဆီဈေးနှုန်းနှင့် သယ်ယူပို့ဆောင်ရေးစရိတ်များ မြင့်တက်လာမှုကြောင့် အခြေခံလူသုံးကုန်ပစ္စည်းဈေးနှုန်းများ မြင့်တက်မည့်အန္တရာယ်နှင့် ရင်ဆိုင်နေရပြီး အထူးသဖြင့် စားအုန်းဆီဈေးမှာ တစ်ဘူးလျှင် ၅ ဘတ်မှ ၈ ဘတ်အထိ မြင့်တက်ခဲ့ကြောင်း သိရသည်။ ပလတ်စတစ်ကုန်ကြမ်းနှင့် သယ်ယူပို့ဆောင်ရေးစရိတ်ကြီးမြင့်မှုကြောင့် ရေသန့်လက်ကားဈေးများ တက်လာသည့်အပြင် ၅ ဘတ်တန်မုန့်အချို့မှာလည်း ထုတ်လုပ်မှုရပ်ဆိုင်းသည့်အထိ သက်ရောက်မှုရှိနေသည်။ ပြည်တွင်းကုန်သွယ်ရေးဦးစီးဌာနက စားအုန်းဆီလက်ကျန် အလုံအလောက်ရှိသဖြင့် လာမည့်ဧပြီလအထိ ဈေးနှုန်းတည်ငြိမ်အောင် ထိန်းထားရန် ကုန်ထုတ်လုပ်ငန်းကြီးများနှင့် သဘောတူညီထားသော်လည်း အရှေ့အလယ်ပိုင်းစစ်ပွဲကြောင့် ထုပ်ပိုးမှုကုန်ကြမ်းပြတ်တောက်နိုင်ခြေရှိနေသဖြင့် အစိုးရအနေဖြင့် ကုန်စည်သိုလှောင်မှုနှင့် မတရားအမြတ်ထုတ်မှုများကို တားဆီးရန် စစ်ဆေးမှုများ တိုးမြှင့်လုပ်ဆောင်သွားမည်ဖြစ်ကြောင်း သိရှိရပါသည်။