အမေရိကန်-အစ္စရေးနှင့် အီရန်တို့ကြား ဖြစ်ပွားနေသော စစ်ပွဲကြောင့် မြင့်တက်လာသည့် ရေနံစျေးနှုန်းများကို လျှော့ချရန် ကြိုးပမ်းမှုအဖြစ် ပင်လယ်ပြင်ရှိ အီရန်ရေနံများ ဝယ်ယူခွင့်အပေါ် ချမှတ်ထားသော ပိတ်ဆို့အရေးယူမှုများကို ထရမ့်အစိုးရက ရက်ပေါင်း ၃၀ ကြာ ကင်းလွတ်ခွင့်ပြုလိုက်သည်။
ဤကင်းလွတ်ခွင့်ကြောင့် ကမ္ဘာ့ဈေးကွက်အတွင်းသို့ ရေနံစိမ်းစည်ပေါင်း သန်း ၁၄၀ ခန့် ဝင်ရောက်လာမည်ဖြစ်ပြီး စွမ်းအင်ထောက်ပံ့မှုအပေါ် ဖိအားများကို သက်သာစေမည်ဖြစ်ကြောင်း ဘဏ္ဍာရေးဝန်ကြီး စကော့ဘက်ဆက်က X တွင် ရေးသားခဲ့သည်။အမေရိကန်နှင့် အစ္စရေးတို့က အီရန်အပေါ် သုံးပတ်နီးပါးကြာ တိုက်ခိုက်မှုများ ပြုလုပ်ခဲ့ပြီးနောက် ရေနံစျေးနှုန်းများ ထိုးတက်လာခဲ့သည်။ ယင်းအခြေအနေသည် လာမည့် နိုဝင်ဘာလ ကြားဖြတ်ရွေးကောက်ပွဲမတိုင်မီ အမေရိကန် စီးပွားရေးလုပ်ငန်းရှင်များနှင့် စားသုံးသူများကို ထိခိုက်စေကာ ရီပတ်ဘလီကန်ပါတီ၏ လွှတ်တော်ထိန်းချုပ်နိုင်မှုအပေါ် သက်ရောက်မည်ကို အိမ်ဖြူတော်က စိုးရိမ်နေခြင်းဖြစ်သည်။အာရှအတွက် သတင်းကောင်းအရှေ့အလယ်ပိုင်း ရေနံကို အဓိကဝယ်ယူနေသည့် အာရှဒေသအတွက် ဤခြေလှမ်းမှာ အကျိုးရှိမည်ဟု မျှော်လင့်ရသည်။ စွမ်းအင်ဝန်ကြီး ခရစ္စရိုက်က ရေနံများမှာ အာရှသို့ ၃ ရက် သို့မဟုတ် ၄ ရက်အတွင်း ရောက်ရှိနိုင်ပြီး သန့်စင်ပြီးပါက လာမည့် ၆ ပတ်အတွင်း ဈေးကွက်ထဲသို့ ဝင်ရောက်လာမည်ဟု ပြောကြားခဲ့သည်။အခြားနိုင်ငံများက ပိတ်ဆို့အရေးယူမှုကြောင့် အီရန်ရေနံကို ရှောင်ကြဉ်နေချိန်တွင် တရုတ်နိုင်ငံမှ တစ်သီးပုဂ္ဂလ ရေနံချက်စက်ရုံများသည် စျေးနှုန်းချိုသာမှုကြောင့် အဓိက ဝယ်ယူသူများ ဖြစ်ခဲ့ကြသည်။ အိန္ဒိယ၊ တောင်ကိုရီးယား၊ ဂျပန်၊ အီတလီ၊ ဂရိ၊ ထိုင်ဝမ်နှင့် တူရကီတို့သည်လည်း ၂၀၁၈ ခုနှစ် ပိတ်ဆို့မှုများ မတိုင်မီက အီရန်ရေနံကို အဓိက ဝယ်ယူခဲ့ကြသူများ ဖြစ်သည်။စွမ်းအင်ဈေးကွက်ကို ထိန်းချုပ်ရန် ကြိုးပမ်းမှုဘဏ္ဍာရေးဝန်ကြီးဌာနအနေဖြင့် ၂ ပတ်အတွင်း ပြိုင်ဘက်နိုင်ငံများ၏ ရေနံအပေါ် ပိတ်ဆို့မှုများကို ယာယီဖြေလျှော့ပေးခဲ့သည်မှာ ယခုအကြိမ်သည် တတိယအကြိမ်မြောက် ဖြစ်သည်။ ၂၀၂၂ ခုနှစ်နောက်ပိုင်း တစ်စည်လျှင် ဒေါ်လာ ၁၀၀ အထက်သို့ အမြင့်ဆုံး ရောက်ရှိနေသည့် စွမ်းအင်စျေးနှုန်းများကို ထိန်းသိမ်းရန် အစိုးရက ကြိုးပမ်းနေခြင်းဖြစ်သည်။အမေရိကန်သည် ရုရှားရေနံအပေါ် ပိတ်ဆို့မှုများကိုလည်း ယခင်က ဖြေလျှော့ပေးခဲ့ပြီး၊ ပြီးခဲ့သည့် သောကြာနေ့ကလည်း သင်္ဘောပေါ်တင်ဆောင်ထားသည့် အီရန်ရေနံစိမ်းနှင့် ရေနံထွက်ပစ္စည်းများကို ရောင်းချခွင့်ပြုသည့် အထွေထွေလိုင်စင်ကို ထုတ်ပြန်ခဲ့သည်။ဖေဖော်ဝါရီ ၂၈ ရက်တွင် အမေရိကန်နှင့် အစ္စရေးတို့ တိုက်ခိုက်မှု စတင်ကတည်းက ရေနံစျေးနှုန်း ၅၀ ရာခိုင်နှုန်းခန့် ခုန်တက်သွားခဲ့သည်။ အီရန်ကလည်း အစ္စရေးနှင့် အမေရိကန်တပ်စခန်းများရှိရာ ပင်လယ်ကွေ့နိုင်ငံများကို ပြန်လည်တိုက်ခိုက်ခဲ့သည်။ လက်ရှိတွင် အီရန်နှင့် အိမ်နီးချင်း ပင်လယ်ကွေ့နိုင်ငံများရှိ အရေးပါသော စွမ်းအင်အခြေခံအဆောက်အအုံများ တိုက်ခိုက်ခံထားရပြီး ကမ္ဘာ့ရေနံနှင့် သဘာဝဓာတ်ငွေ့ ၂၀ ရာခိုင်နှုန်းခန့် ဖြတ်သန်းရာ 'ဟော်မုဇ် ရေလက်ကြား' ကိုလည်း အီရန်က ပိတ်ဆို့ထားဆဲဖြစ်သည်။
