မန်စီးတီးနည်းပြ ဂွါဒီယိုလာ၏ နေရာတွင် အစားထိုးရန် ရေပန်းစားနေသည့် ဂျီရိုနာနည်းပြ မစ်ချဲလ်က မည်သည့်အသင်းကိုမဆို ကိုင်တွယ်ရန် အသင့်ရှိကြောင်း ထုတ်ဖော်ပြောကြား

ဂျီရိုနာအသင်းအား လာလီဂါတွင် အောင်မြင်မှုများရရှိအောင် စွမ်းဆောင်ပေးထားသည့် နည်းပြ မစ်ချဲလ် (Míchel) က ၎င်းအနေဖြင့် မည်သည့်အသင်းကြီးကိုမဆို ကိုင်တွယ်ရန် အသင့်ဖြစ်နေပြီဖြစ်ကြောင်း ပြောကြားလိုက်သည်။ မစ်ချဲလ်သည် ဗယ်လက်ကာနိုနှင့် ဟူဆကာအသင်းတို့ကို လာလီဂါသို့ တန်းတက်ခွင့်ရရှိအောင် စွမ်းဆောင်ပေးခဲ့သူဖြစ်ပြီး၊ ၂၀၂၃-၂၄ ရာသီတွင် ဂျီရိုနာအသင်းကို အဆင့် (၃) နေရာဖြင့် ချန်ပီယံလိဂ်ဝင်ခွင့် ရရှိစေခဲ့သူဖြစ်သည်။ ဂျီရိုနာသည် မန်စီးတီးကို ပိုင်ဆိုင်သည့် City Football Group ၏ အစိတ်အပိုင်းတစ်ခုဖြစ်သောကြောင့် ဂွါဒီယိုလာ ထွက်ခွာပါက မစ်ချဲလ်သည် အလားအလာအရှိဆုံး အစားထိုးခံရမည့်သူအဖြစ် ထင်ကြေးပေးခံနေရခြင်းဖြစ်သည်။ ၎င်းက မန်စီးတီးကဲ့သို့ အသင်းကြီးမျိုးကို ကိုင်တွယ်ရန် မေးမြန်းမှုအပေါ် မိမိတွင် အံဝင်ခွင်ကျဖြစ်နိုင်သည့် အရည်အချင်းရှိပြီး စိန်ခေါ်မှုများကို ကြိုးစားကြည့်ချင်ကြောင်း ယုံကြည်မှုရှိရှိ တုံ့ပြန်ခဲ့ခြင်းဖြစ်ပါသည်။