အိုးဝေသုံးဘီးယာဉ်များကို ရန်ကုန်မှအပ တနိုင်ငံလုံးသုံးကြပြီး မန္တလေးတွင် အစီးရေ ၁သိန်းကျော်ရှိကာ မြို့တွင်း သာမက စစ်ကိုင်း၊ ကျောက်ဆည်၊ ပြင်ဦးလွင်စသည့် အနီးမြို့များသို့ပါ သွားရောက်ပို့ဆောင်ရသဖြင့် အများသုံးယာဉ် သဖွယ်ဖြစ်နေ သည်။ကိုယ်ပိုင်ကား၊ ဆိုင်ကယ်များအား စုံ/မ ခွဲပြီး တရက်ခြားတခါသာ မောင်းနှင် ခွင့်ပြုထားသောကြောင့် အိုးဝေငှားရမ်း စီးနင်းသူ ပိုမိုများပြား လာသော်လည်း ဆီခွဲတမ်းကန့်သတ်ချက်ကြောင့် မှောင်ခိုဈေးကွက်မှ ဈေးကြီးပေးဝယ်ပြီး မောင်းနှင်ရသဖြင့် ခရီးသည်များမှာလည်း ဈေးပိုပေးနေရသည်ဟု ဆိုသည်။ စက်သုံးဆီအရောင်းဆိုင်များတွင် တရက်အတွင်း ၁ ကြိမ်ထက်ပိုသော တန်းစီဝယ်ယူမှု လျော့နည်းပပျောက် စေရန် Wheel Tax ပါ အချက်အလက်အသုံးပြု၍ QR ကုတ်စနစ်ဖြင့် ရောင်းချရန် မတ် ၁၂ ရက်၌ သတ်မှတ်ခဲ့ပြီးနောက် ဆိုင်များ က တကြိမ်ဝယ်ယူမှုအတွက် ဆိုင်ကယ် ၂ လီတာ၊ သုံးဘီး/အိုးဝေ ၄ လီတာ၊ အိမ်စီးကားများ ၁၂ လီတာ၊ Light Truck (အိမ် စီးကားအမျိုးအစား) ၂၀ လီတာ၊ ခရီးသည်တင်ယာဉ်နှင့် ကုန်ကားကြီးများ ၅၀ လီတာနှုန်းဖြင့်သာ ရောင်းချပေးနေသည်။ သုံးဘီးအငှားယာဉ်(အိုးဝေ)များအနေဖြင့် လက်ရှိဆီဈေးနှုန်းအရ အနည်းဆုံး ကျပ် ၂ သောင်းခွဲဖိုးရောင်းပေးမှ အဆင်ပြေ မည့် အခြေအနေဖြစ်ပြီး ဆီအခက်အခဲကြောင့် ခရီးသည်ပို့ဆောင်ခများလည်း ဈေးမြင့်တက်ကာ ယခင် ၈၀၀၀ ခန့် ပေးရ သည့် ခရီးစဉ်အတွက် ယခု ကျပ် ၁ သောင်း ၂ ထောင်ခန့်ထိ တောင်းနေရကြောင်း သိရသည်။
