ထိုင်းနိုင်ငံ Cha-am မှာ ဘုရားဖူးကားတစ်စီး ဓာတ်တိုင်တွေကို ဝင်တိုက်မိပြီးနောက် ခရီးသွား ၅၂ ယောက် ဒဏ်ရာရ

ထိုင်းနိုင်ငံ Petchaburi ပြည်နယ်၊ Cha-am မြို့နယ်ရှိ Phetkasem လမ်းမပေါ်တွင် ယနေ့ မတ်လ ၁၇ ရက် နံနက်အစောပိုင်းက ဘုရားကိုးဆူဖူးရန် ခရီးသည် ၅၂ ဦး တင်ဆောင်လာသည့် ဘုရားဖူးကားတစ်စီးသည် လျှပ်စစ်ဓာတ်တိုင်များကို ဝင်တိုက်မိသည့် မတော်တဆမှု ဖြစ်ပွားခဲ့ရာ ကားပေါ်ပါလာသူ ၅၂ ဦးစလုံး ဒဏ်ရာရရှိခဲ့ပြီး ၎င်းတို့အနက် ၆ ဦးမှာ ပြင်းထန်ဒဏ်ရာများ ရရှိခဲ့ကြောင်း သိရသည်။ အဆိုပါ ယာဉ်တိုက်မှုကြောင့် ဗို့အားမြင့် လျှပ်စစ်ဓာတ်တိုင်နှစ်တိုင် လဲကျကာ ဓာတ်ကြိုးများ ပြတ်တောက်သွားသဖြင့် အာဏာပိုင်များက နယ်မြေအတွင်း လျှပ်စစ်မီး ယာယီဖြတ်တောက်ထားခဲ့ရပြီး၊ ရဲတပ်ဖွဲ့၏ ကနဦးစစ်ဆေးချက်များအရ ယာဉ်မောင်းမှာ အခြားကားတစ်စီးကို ရှောင်တိမ်းရာမှ အရှိန်လွန်သွားခြင်း သို့မဟုတ် အိပ်ငိုက်ခြင်းတို့ကြောင့် ဖြစ်နိုင်သည်ဟု ယူဆကာ ဖြစ်စဉ်အသေးစိတ်ကို ဆက်လက်စုံစမ်းစစ်ဆေးလျက်ရှိကြောင်း သိရသည်။