ဒူဘိုင်းလေဆိပ်အနီး ဒရုန်းဖြင့် တိုက်ခိုက်ခံရမှုကြောင့် လောင်စာတိုင်ကီ မီးလောင်ပြီး လေယာဉ်ခရီးစဉ်များ ယာယီရပ်ဆိုင်း

ဒူဘိုင်းနိုင်ငံတကာလေဆိပ် (DXB) အနီးတွင် တနင်္လာနေ့က ဒရုန်းဖြင့် တိုက်ခိုက်ခံရမှုကြောင့် လောင်စာဆီတိုင်ကီတစ်ခု မီးလောင်မှုဖြစ်ပွားခဲ့ပြီး လေယာဉ်ခရီးစဉ်များအားလုံးကို ယာယီရပ်ဆိုင်းထားရကြောင်း ဒူဘိုင်းအာဏာပိုင်များက ထုတ်ပြန်ခဲ့သည်။ အဆိုပါမီးလောင်မှုကို အချိန်မီထိန်းချုပ်နိုင်ခဲ့သဖြင့် လူထိခိုက်ဒဏ်ရာရရှိမှု မရှိသော်လည်း အမ်းမရိတ်စ် (Emirates) လေကြောင်းလိုင်းအပါအဝင် လေယာဉ်ခရီးစဉ် အဝင်/အထွက်များအားလုံးကို လုံခြုံရေးအရ ဆိုင်းငံ့ထားခဲ့ရသည်။ ပြီးခဲ့သည့် ဖေဖော်ဝါရီလနှောင်းပိုင်းမှစတင်၍ အမေရိကန်၊ အစ္စရေးနှင့် အီရန်တို့အကြား စစ်ပွဲဖြစ်ပွားနေမှုကြောင့် ပင်လယ်ကွေ့ဒေသအတွင်း ဒရုန်းနှင့် ဒုံးကျည်တိုက်ခိုက်မှုပေါင်း (၂,၀၀၀) ကျော်အထိ ရှိလာခဲ့ပြီး၊ အထူးသဖြင့် အစ္စရေးနှင့် ဆက်ဆံရေးထူထောင်ထားသည့် အာရပ်စော်ဘွားများပြည်ထောင်စု (UAE) သည် အပြင်းထန်ဆုံး ပစ်မှတ်ထားတိုက်ခိုက်ခံနေရခြင်း ဖြစ်သည်။ လက်ရှိတွင် ပင်လယ်ကွေ့အာရပ်နိုင်ငံများအားလုံးက ယခုတိုက်ခိုက်မှုများအပေါ် အီရန်ကို ပြင်းထန်စွာ ရှုတ်ချထားကြပြီး ဒေသတွင်း လုံခြုံရေးအခြေအနေမှာလည်း အလွန်စိုးရိမ်ဖွယ်ရာ အဆင့်သို့ ရောက်ရှိနေပါသည်။