သွင်းကုန်တွေအပေါ် ကန့်သတ်ချက်တွေ တင်းကျပ်လာတာကြောင့် မြန်မာ့ဈေးကွက်ထဲမှာ နိုင်ငံခြားဖြစ် ကုန်ပစ္စည်းတွေ ရှားပါးလာပြီး ကုန်ဈေးနှုန်း မြင့်တက်လာ

နိုင်ငံခြားငွေ သုံးစွဲမှုကို ထိန်းချုပ်ဖို့ သွင်းကုန်တွေကို တင်းကျပ်လိုက်တာကြောင့် မြန်မာနိုင်ငံဈေးကွက်ထဲမှာ သွင်းကုန်တွေ တဖြည်းဖြည်း ပျောက်ကွယ်လာပြီး ကြီးမားတဲ့ အကျပ်အတည်းတစ်ခု ဖြစ်ပေါ်နေပါတယ်။ အခုအခါမှာ ထိုင်းနဲ့ တရုတ်နိုင်ငံတို့လို အိမ်နီးချင်းနိုင်ငံတွေကနေ တင်သွင်းတဲ့ ကုန်ပစ္စည်းတွေ နေရာမှာ ပြည်တွင်းဖြစ် အမှတ်တံဆိပ်တွေက အစားထိုး နေရာယူလာတာကို သိသာထင်ရှားစွာ မြင်တွေ့နေရပါတယ်။၂၀၂၅ ခုနှစ် နှစ်လယ်ပိုင်းကစပြီး အာဏာပိုင်တွေက တရားဝင် သွင်းကုန်လိုင်စင် ထုတ်ပေးမှုတွေကို ရပ်ဆိုင်းလိုက်သလို မှောင်ခိုလုပ်ငန်းတွေကိုလည်း ပြင်းပြင်းထန်ထန် နှိမ်နင်းလာတာကြောင့် ဆေးဆိုင်တွေကအစ အဝတ်အထည်ဆိုင်တွေအထိ နိုင်ငံခြားဖြစ် ကုန်ပစ္စည်း ပြတ်လပ်မှုတွေနဲ့ ရင်ဆိုင်နေရပါတယ်။ ပုံမှန်လမ်းကြောင်းတွေကနေ တင်သွင်းလို့ မရတော့တာကြောင့် ကုန်သည်တွေဟာ ကုန်ကျစရိတ်ကြီးမားပြီး အန္တရာယ်ကြီးတဲ့ တရားမဝင် လမ်းကြောင်းတွေကို အသုံးပြုနေရကာ သာမန် အိမ်သုံးပစ္စည်းတွေတောင် ဈေးနှုန်း ၅ ဆလောက် မြင့်တက်သွားပြီး ချမ်းသာတဲ့ လူနည်းစုသာ ဝယ်ယူနိုင်တဲ့ အခြေအနေ ဖြစ်လာပါတယ်။၂၀၂၁ ခုနှစ် မတိုင်ခင်က လုပ်ငန်းရှင်တွေအနေနဲ့ သွင်းကုန်လိုင်စင်နဲ့ နိုင်ငံခြားငွေ ရယူဖို့ လွယ်ကူခဲ့ပေမယ့် ၂၀၂၄ ခုနှစ်မှာတော့ ပို့ကုန်ဝင်ငွေ ပြနိုင်မှသာ သွင်းကုန် တင်သွင်းခွင့်ပြုတဲ့ ထိန်းချုပ်ကုန်သွယ်ရေး စနစ်ကို ပြောင်းလဲကျင့်သုံးခဲ့ပါတယ်။ ၂၀၂၅ ခုနှစ် နှစ်လယ်ပိုင်းအရောက်မှာတော့ ပင်လယ်ရေကြောင်းကနေ တင်သွင်းခွင့် လျှောက်ထားမှု အများစုကို ပယ်ချခဲ့ပြီး နယ်စပ်ကနေ မှောင်ခိုသွင်းလာတဲ့ ကုန်ပစ္စည်းတွေကို ဖ-မ်းဆီးဖို့ ကော်မတီတစ်ရပ် ဖွဲ့စည်းကာ စစ်ဆေးမှုတွေကို ပိုမို တင်းကျပ်လာပါတယ်။အဲဒီ ကန့်သတ်ချက်တွေကြောင့် ကုန်ပစ္စည်းတွေ ရန်ကုန်ကို ရောက်လာချိန်မှာ သယ်ယူပို့ဆောင်ရေး စရိတ်က မူလတန်ဖိုးရဲ့ ၅ ဆနီးပါးအထိ မြင့်တက်လာပြီး အခွန်နဲ့ တရားမဝင် ကောက်ခံငွေတွေကလည်း ၃ ဆအထိ ရှိလာပါတယ်။ နိုင်ငံခြားငွေ ထိန်းချုပ်ဖို့ ရည်ရွယ်လုပ်ဆောင်တာလို့ အာဏာပိုင်တွေက ဆိုပေမယ့် လက်တွေ့မှာတော့ တရားမဝင် ကုန်သွယ်မှုတွေကို ပိုမို ကြီးထွားလာစေပြီး အမေရိကန်ဒေါ်လာကို ပိုပေးဝယ်ရတဲ့ မှောင်ခို နိုင်ငံခြားငွေ ဈေးကွက်ကိုလည်း ပေါ်ပေါက်လာစေကာ သွင်းကုန်လုပ်ငန်းရှင်တွေအနေနဲ့ ကြီးမားတဲ့ အခက်အခဲတွေနဲ့ ရင်ဆိုင်နေရပါတယ်။