မြန်မာ့မီးရထားမှ ဆောင်ရွက်လျက်ရှိသည့် Online Railway Ticketing and Payment System (ORTP) စနစ်တွင် အွန်လိုင်းမှ ရထားလက်မှတ်ဝယ်ယူနိုင်သည့် အချိန်ကန့်သတ်ချက်ကို ရထားမထွက်မီ (၁၀) မိနစ်အထိ တိုးမြှင့်သတ်မှတ်လိုက်ကြောင်း သိရသည်။ယခင်က ORTP စနစ်မှတစ်ဆင့် ရထားလက်မှတ်များကို ရထားမထွက်ခွာမီ (၃၀) မိနစ်အထိသာ ဝယ်ယူခွင့်ပြုထားခဲ့သော်လည်း ခရီးသွားပြည်သူများ ပိုမိုအဆင်ပြေချောမွေ့စေရန်အတွက် ယခုအခါ အချိန်ကန့်သတ်ချက်ကို ပြင်ဆင်၍ ရထားမထွက်ခွာမီ (၁၀) မိနစ်အထိ လက်မှတ်ဝယ်ယူနိုင်ရန် စီစဉ်ပေးလိုက်ခြင်းဖြစ်ကြောင်း သိရသည်။အဆိုပါ ပြင်ဆင်မှုကြောင့် ဘူတာရုံသို့ အနည်းငယ်နောက်ကျမှ ရောက်ရှိလာသော ခရီးသည်များနှင့် ရုတ်တရက် ခရီးသွားရန် လိုအပ်လာသူများအနေဖြင့်လည်း ရထားမထွက်မီ (၁၀) မိနစ်အထိ ORTP စနစ်မှတစ်ဆင့် လွယ်ကူလျင်မြန်စွာ ရထားလက်မှတ် ဝယ်ယူနိုင်မည်ဖြစ်ကြောင်း သိရသည်။ရထားလက်မှတ်များကို အွန်လိုင်းစနစ်ဖြင့် ဝယ်ယူလိုပါက မိမိအသုံးပြုနေသည့် Browser မှတစ်ဆင့် ORTP Website Link သို့ ဝင်ရောက်နိုင်သလို သတ်မှတ်ထားသည့် QR Code ကို Scan ဖတ်၍လည်း ဝင်ရောက်နိုင်ကြောင်း သိရသည်။ Website ၏ ပင်မစာမျက်နှာသို့ ရောက်ရှိပါက သွားလိုသည့် ခရီးစဉ်ကို ရွေးချယ်ကာ ORTP စနစ်နှင့် သက်ဆိုင်သည့် အသိပေးချက်များနှင့် စည်းကမ်းချက်များအတိုင်း လက်မှတ်များကို ဝယ်ယူနိုင်ကြောင်း သိရသည်။ORTP စနစ်ကို ၂၀၂၆ ခုနှစ် ဖေဖော်ဝါရီလ ၁ ရက်နေ့မှ စတင်အသုံးပြုခဲ့ပြီး လက်ရှိတွင် ရန်ကုန်–မန္တလေး–ရန်ကုန် လူစီးအမြန်ရထား အမှတ် (၁၁) အဆန်/(၁၂) အစုန်၊ ရန်ကုန်–နေပြည်တော်–ရန်ကုန် DEMU အမြန်ရထား အမှတ် (၇) အဆန်/(၈) အစုန်၊ (၃၁) အဆန်/(၃၂) အစုန် နှင့် မန္တလေး–နေပြည်တော်–မန္တလေး အမြန်ရထား အမှတ် (၂၇) အဆန်/(၂၈) အစုန် ခရီးစဉ်များအတွက် အွန်လိုင်းမှ လက်မှတ် ဝယ်ယူနိုင်ရန် ဝန်ဆောင်မှုများ ပေးဆောင်လျက်ရှိကြောင်း သိရသည်။
