ဂျပန်တစ်နိုင်ငံလုံးရှိ အစိုးရစာသင်ကျောင်းများတွင် ဆရာ၊ ဆရာမနေရာ ၃,၈၂၇ ခု လစ်လပ်နေကြောင်း စစ်တမ်းအရ သိရ

ဂျပန်ပညာရေးဝန်ကြီးဌာန၏ ကြာသပတေးနေ့ (မတ်လ ၅ ရက်) ထုတ်ပြန်ချက်အရ နိုင်ငံတစ်ဝှမ်းရှိ အစိုးရမူလတန်း၊ အလယ်တန်းနှင့် အထက်တန်းကျောင်းများတွင် ဆရာ၊ ဆရာမ လိုအပ်ချက် အဆမတန် မြင့်တက်နေပြီး လစ်လပ်နေရာပေါင်း ၃,၈၂၇ ခုအထိ ရှိနေကြောင်း သိရသည်။ ဤကိန်းဂဏန်းသည် လွန်ခဲ့သော ၄ နှစ်ကထက် နှစ်ဆနီးပါး မြင့်တက်လာခြင်းဖြစ်ပြီး အထူးသဖြင့် မူလတန်းကျောင်းများတွင် အတန်းပိုင်ဆရာ လိုအပ်ချက်မှာ ယခင်ကထက် နှစ်ဆကျော် ပိုမိုဆိုးရွားလာသည်။ ဆရာ၊ ဆရာမများ ဖျားနာခြင်း၊ ကိုယ်ဝန်ဆောင်ခြင်းနှင့် အခြားအကြောင်းအမျိုးမျိုးကြောင့် အနားယူကြသော်လည်း ၎င်းတို့နေရာတွင် အစားထိုးရန် အချိန်ပိုင်းဆရာများကိုပင် ရှာဖွေရန် ခက်ခဲနေကြောင်း ဝန်ကြီးဌာနက ဆိုသည်။ လက်ရှိတွင် ဆရာမလုံလောက်မှုကြောင့် ကျောင်းအုပ်ကြီးများနှင့် အကြီးတန်းဆရာများကပါ အတန်းပိုင်အဖြစ် ဝင်ရောက်သင်ကြားပေးနေရပြီး၊ အထူးပညာရေးကျောင်းများတွင် ဆရာလိုအပ်ချက် အမြင့်မားဆုံးဖြစ်နေကြောင်း စစ်တမ်းက ဖော်ပြထားသည်။