ဒေသတွင်းစစ်ပွဲဂယက်ကြောင့် Finalissima ပွဲကို ကာတာမှ အခြားကွင်းသို့ ပြောင်းလဲကျင်းပရန် စပိန်နည်းပြ တောင်းဆို

အရှေ့အလယ်ပိုင်းဒေသတွင်း စစ်ရေးပဋိပက္ခများကြောင့် လာမည့် မတ်လ ၂၇ ရက်နေ့တွင် ကာတာနိုင်ငံ၊ ဒိုဟာမြို့၌ ကျင်းပရန် စီစဉ်ထားသည့် စပိန်နှင့် အာဂျင်တီးနားတို့၏ Finalissima ပွဲစဉ်ကို ဘေးကင်းလုံခြုံစိတ်ချရသော အခြားကွင်းတစ်ခုသို့ ပြောင်းလဲကျင်းပရန် စပိန်အသင်းနည်းပြ ဒယ်လာဖွန်တေက တောင်းဆိုလိုက်သည်။ ဥရောပချန်ပီယံနှင့် တောင်အမေရိကချန်ပီယံတို့ ထိပ်တိုက်တွေ့ဆုံမည့် အဆိုပါပွဲစဉ်နှင့်ပတ်သက်၍ UEFA နှင့် CONMEBOL တို့က အခြေအနေကို မျက်ခြည်မပြတ် စောင့်ကြည့်နေပြီး၊ ဒယ်လာဖွန်တေကမူ လက်ရှိအခြေအနေအရ ဒိုဟာတွင် ပွဲကျင်းပရန် မဖြစ်နိုင်တော့သဖြင့် တာဝန်ရှိသူများအကြား ကွင်းပြောင်းလဲရေး ဆွေးနွေးမှုများ စတင်နေပြီဖြစ်ကြောင်း ထုတ်ဖော်ပြောကြားခဲ့သည်။ မက်ဆီ၏ အာဂျင်တီးနားအသင်း ကမ္ဘာ့ဖလားရခဲ့သည့် Lusail Stadium တွင် ကစားရန် ရည်ရွယ်ထားသော်လည်း လက်ရှိစစ်ပွဲဂယက်များကြောင့် ပွဲကျင်းပနိုင်ရန် မသေချာသည့် အနေအထားသို့ ရောက်ရှိနေခြင်းဖြစ်သည်။