ရန်ကုန်အရှေ့ပိုင်းတက္ကသိုလ် ကျောင်းသားများသမဂ္ဂ ဥက္ကဋ္ဌ မဆုရည်လင်းအပါအဝင်နှစ်ရှည်ချမှတ်ခံရသူ သုံးဦး လွတ်မြောက်

တောင်သူလယ်သမားနေ့ကို ဂုဏ်ပြုသောအားဖြင့်နှင့် လူသားချင်းစာနာထောက်ထားမှုကို အလေးထား၍ နိုင်ငံတော်စီမံအုပ်ချုပ်ရေးကောင်စီက ပြစ်ဒဏ်လွတ်ငြိမ်းခွင့်ပြုခဲ့ရာတွင် ရန်ကုန်အရှေ့ပိုင်းတက္ကသိုလ် ကျောင်းသားများသမဂ္ဂ ဥက္ကဋ္ဌ မဆုရည်လင်းနှင့် ရန်ကုန်စီးပွားရေးတက္ကသိုလ် ကျောင်းသားများသမဂ္ဂ (ရွာသာကြီး) မှ ဒုဥက္ကဋ္ဌ ကိုထက်ပိုင်စိုး၊ မနွေးရတီတိုးတို့သည် (မတ်လ ၂ ရက်) တွင် လွတ်မြောက်လာခဲ့ကြောင်း သိရသည်။ အဆိုပါ ကျောင်းသားများသည် အကြမ်းဖက်မှုတိုက်ဖျက်ရေးဥပဒေပုဒ်မများဖြင့် နှစ်ရှည်ထောင်ဒဏ်များ ချမှတ်ခံထားရသူများဖြစ်ပြီး၊ ယခုအခါ "နောက်တစ်ကြိမ် ပြစ်မှုထပ်မံကျူးလွန်ပါက ယခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံရမည်" ဟူသော စည်းကမ်းချက်ဖြင့် ကျန်ရှိသောပြစ်ဒဏ်များအပေါ် လျှော့ပေါ့၍ ပြန်လည်လွတ်မြောက်လာခြင်းဖြစ်သည်။