အလုပ်ထွက်စာတင်ထားစဉ် ဆေးခွင့်ယူသည့် စင်ကာပူဝန်ထမ်းတစ်ဦးအား မန်နေဂျာဖြစ်သူက ရိုင်းစိုင်းစွာဆဲဆိုပြီး ကိုယ်ထိလက်ရောက်ကျူးလွန်ရန် ကြိုးပမ်း

စင်ကာပူနိုင်ငံရှိ ကုမ္ပဏီတစ်ခုမှ ဝန်ထမ်းတစ်ဦးသည် အလုပ်ထွက်ရန် နို့တစ်ပေးထားသည့်ကာလအတွင်း ဆေးခွင့် (MC) ယူခဲ့ခြင်းကြောင့် မန်နေဂျာဖြစ်သူ၏ "အသုံးမကျသူ" ဟု ရိုင်းစိုင်းစွာ ဆဲဆိုခြင်းနှင့် လှောင်ပြောင်ခြင်းတို့ကို ခံခဲ့ရကြောင်း The Independent Singapore သတင်းဌာနက ဖော်ပြခဲ့သည်။ အဆိုပါမန်နေဂျာသည် ဝန်ထမ်းအား အကွက်ကျကျစီစဉ်၍ အသင်းအဖွဲ့ကို ဒုက္ခပေးသည်ဟု စွပ်စွဲသည့်အပြင် ကိုယ်ထိလက်ရောက်ကျူးလွန်ရန်အထိ ကြိုးပမ်းခဲ့သဖြင့် ဘေးလူများက ဝိုင်းဝန်းတားဆီးခဲ့ရကြောင်း၊ နစ်နာသူဝန်ထမ်းမှာ စိတ်မသက်မသာဖြစ်ရသဖြင့် အလုပ်ထွက်မည့်ရက်ကို လျှော့ပေးရန် HR ဌာနသို့ တောင်းဆိုထားကြောင်း သိရသည်။ စင်ကာပူလူ့စွမ်းအားအရင်းအမြစ်ဝန်ကြီးဌာန (MOM) ၏ ထုတ်ပြန်ချက်အရ လုပ်ငန်းခွင်အတွင်း ရိုင်းစိုင်းစွာပြောဆိုခြင်းမှာ ဥပဒေအရအရေးယူနိုင်သည့် နှောက်ယှက်စော်ကားမှုမြောက်သဖြင့် အွန်လိုင်းအသုံးပြုသူများက ရဲစခန်း၌ တိုင်ချက်ဖွင့်ရန် တိုက်တွန်းလျက်ရှိကြသည်။