ယူအေအီးနိုင်ငံ၏ အရေးကြီးကဏ္ဍများကို ပစ်မှတ်ထားသည့် စနစ်တကျ အကြမ်းဖက် ဆိုင်ဘာတိုက်ခိုက်မှုများကို ဟန့်တားနိုင်ခဲ့

ယူအေအီး (UAE) နိုင်ငံ၏ အမျိုးသား ဆိုင်ဘာလုံခြုံရေးကောင်စီ (Cyber Security Council) သည် နိုင်ငံအတွင်းရှိ အရေးကြီးပြီး မဟာဗျူဟာမြောက်သော ကဏ္ဍများကို ပစ်မှတ်ထားသည့် စနစ်တကျ ဆိုင်ဘာတိုက်ခိုက်မှု (Organised Terrorist Cyberattacks) များကို အောင်မြင်စွာ ဟန့်တားနိုင်ခဲ့ကြောင်း ဖေဖော်ဝါရီ ၂၁၊ ၂၀၂၆ တွင် သတင်းထုတ်ပြန်ခဲ့သည်။ အဆိုပါ တိုက်ခိုက်မှုများသည် နိုင်ငံတကာရှိ အကြမ်းဖက်အဖွဲ့အစည်းများနှင့် ဆက်နွှယ်နေပြီး နိုင်ငံ၏ အခြေခံအဆောက်အအုံများကို ထိခိုက်စေရန် ရည်ရွယ်ခဲ့ခြင်းဖြစ်သည်။လုံခြုံရေးကောင်စီ၏ ထုတ်ပြန်ချက်အရ ၎င်းတို့၏ စနစ်များသည် တစ်နေ့လျှင် ပျမ်းမျှ ဆိုင်ဘာတိုက်ခိုက်မှုပေါင်း ၂၀၀,၀၀၀ ခန့်ကို ပုံမှန်ဟန့်တားပေးလျက်ရှိသည်။ ယခုနောက်ဆုံး ဖြစ်စဉ်တွင် အကြမ်းဖက်အုပ်စုများသည် နိုင်ငံပေါင်း ၁၄ နိုင်ငံရှိ နေရာအသီးသီးမှနေ၍ တိုက်ခိုက်ခဲ့ခြင်းဖြစ်ပြီး၊ ယူအေအီး၏ နည်းပညာမြင့် စောင့်ကြည့်ရေးစနစ်များက ၎င်းတို့၏ တည်နေရာနှင့် မည်သူမည်ဝါဖြစ်ကြောင်းကို တိကျစွာ ဖော်ထုတ်နိုင်ခဲ့သည်။ ပစ်မှတ်ထားခံရသည့် ကဏ္ဍများတွင် အစိုးရဌာနများ (၃၀%)၊ ဘဏ်နှင့် ဘဏ္ဍာရေး (၇%)၊ ပညာရေး (၇%) နှင့် လေကြောင်း၊ ဆေးရုံနှင့် နည်းပညာကဏ္ဍများ ပါဝင်သည်။