ကမ္ဘောဒီးယား၏ စီးပွားရေး တိုးတက်လာမှုနှင့်အတူ ကုန်သွယ်ရေး ဆက်ဆံရေး တိုးချဲ့ရန် အမေရိကန် ပြင်ဆင်

ကမ္ဘောဒီးယားနိုင်ငံ၏ လျင်မြန်သော လူမှုစီးပွား ဖွံ့ဖြိုးတိုးတက်မှုကို အကြောင်းပြု၍ အမေရိကန်ပြည်ထောင်စုအနေဖြင့် ကမ္ဘောဒီးယားနှင့် မိတ်ဖက်အဖြစ် ပိုမိုခိုင်မာစေရန် ကုန်သွယ်ရေးနှင့် စီးပွားရေး အခွင့်အလမ်းသစ်များကို ရှာဖွေဖော်ထုတ်လျက်ရှိကြောင်း အမေရိကန် နိုင်ငံခြားရေးဝန်ကြီးဌာန ဒုတိယဝန်ကြီး Christopher Landau က စနေနေ့ (ဖေဖော်ဝါရီ ၂၁၊ ၂၀၂၆) တွင် ပြောကြားခဲ့သည်။ ဝါရှင်တန်ဒီစီတွင် ကျင်းပသည့် Board of Peace အစည်းအဝေးတွင် ဝန်ကြီးချုပ် ဟွန်မာနက် (Hun Manet) နှင့် တွေ့ဆုံစဉ် ၎င်းက ထိုသို့ ပြောကြားခဲ့ခြင်း ဖြစ်သည်။အထူးသဖြင့် ကမ္ဘောဒီးယား၏ Air Cambodia လေကြောင်းလိုင်းမှ အမေရိကန်၏ Boeing 737 MAX လေယာဉ်များကို ဝယ်ယူခဲ့မှုအပေါ် ကျေးဇူးတင်ရှိကြောင်းနှင့် ဤသည်မှာ နှစ်နိုင်ငံ စီးပွားရေးပူးပေါင်းဆောင်ရွက်မှု၏ ပြယုဂ်တစ်ခုဖြစ်ကြောင်း Landau က ဆိုသည်။ ၂၀၂၅ ခုနှစ်အတွင်း နှစ်နိုင်ငံ ကုန်သွယ်မှုမှာ ၂၉ ရာခိုင်နှုန်းခန့် မြင့်တက်ခဲ့ပြီး၊ အမေရိကန်သည် ကမ္ဘောဒီးယား၏ အကြီးဆုံး ပို့ကုန်စျေးကွက်အဖြစ် ဆက်လက်တည်ရှိနေသည်။ ထို့ပြင် ကမ္ဘောဒီးယားမှ ပို့ကုန်များအပေါ် အမေရိကန်၏ သွင်းကုန်ခွန်ကို ၁၉ ရာခိုင်နှုန်းအထိ လျှော့ချပေးမည့် "အပြန်အလှန် ကုန်သွယ်ရေး သဘောတူညီချက်" (Reciprocal Trade Agreement) အပေါ်တွင်လည်း နှစ်ဖက်ခေါင်းဆောင်များက အပြုသဘောဆောင် ဆွေးနွေးခဲ့ကြသည်။