ရွှေတိဂုံစေတီတော်တွင် ဗုဒ္ဓပူဇနိယ တပေါင်းပွဲတော် ၁၀ ရက်ကြာ ကျင်းပရန် စီစဉ်

ရန်ကုန်မြို့၊ ရွှေတိဂုံစေတီတော်မြတ်ကြီး၏ (၂၆၁၄) ခုနှစ်မြောက် ဗုဒ္ဓပူဇနိယ တပေါင်းပွဲတော်ကြီးကို လာမည့် ဖေဖော်ဝါရီလ ၂၁ ရက်မှ မတ်လ ၂ ရက်နေ့ (တပေါင်းလပြည့်နေ့) အထိ ၁၀ ရက်ကြာ ကျင်းပသွားမည်ဖြစ်ပြီး၊ ပွဲတော်ကာလအတွင်း သံဃာတော် ၁၂၀ ပါးတို့မှ နာရီပေါင်း ၂၁၆ နာရီတိုင်တိုင် အသံမစဲ မဟာပဋ္ဌာန်းရွတ်ဖတ်ပူဇော်ခြင်း၊ အဖိတ်နေ့တွင် သံဃာတော်နှင့် သီလရှင် ၁၄၈ ပါးတို့အား ဆွမ်းဆန်တော် လောင်းလှူခြင်းနှင့် တပေါင်းလပြည့်နေ့ အရုဏ်တက်တွင် ဆွမ်းတော်ကြီး ဆက်ကပ်လှူဒါန်းခြင်း စသည့် ကုသိုလ်ရေးအစီအစဉ်များကို ဘာသာရေးအခမ်းအနားအမျိုးမျိုးဖြင့် စည်ကားသိုက်မြိုက်စွာ ထည့်သွင်းကျင်းပသွားမည်ဖြစ်ကြောင်း ဂေါပကအဖွဲ့မှ သိရသည်။