တရုတ်နိုင်ငံ ဟူဘေးပြည်နယ်ရှိ မီးရှူးမီးပန်းအရောင်းဆိုင်တစ်ဆိုင်၌ ယနေ့ ဖေဖော်ဝါရီလ ၁၈ ရက်တွင် ပေါက်ကွဲမှုဖြစ်ပွားရာ လူ ၁၂ ဦး သေဆုံးကြောင်း နိုင်ငံပိုင်မီဒီယာက ဖော်ပြသည်။ ယခုဖြစ်ရပ်သည် တရုတ်နှစ်သစ်ကူးကာလအတွင်း ဒုတိယအကြိမ်မြောက် မီးရှူးမီးပန်းအရောင်းဆိုင် ပေါက်ကွဲမှုလည်း ဖြစ်သည်။ ဟူဘေးပြည်နယ်အလယ်ပိုင်း ရှန်ယန်မြို့ရှိ အဆိုပါ မီးရှူးမီးပန်းဆိုင်မှ မီးလောင်မှုကို ယနေ့ မွန်းလွဲပိုင်းတွင် အရေးပေါ်ကယ်ဆယ်ရေးအဖွဲ့များက ငြှိမ်းသတ်နိုင်ခဲ့ကြောင်း ဆင်ဟွာသတင်းတွင် ဖော်ပြသည်။ ပေါက်ကွဲမှုဖြစ်ပွားရသည့် အကြောင်းအရင်းကို အာဏာပိုင်များက စုံစမ်းနေဆဲဖြစ်ပြီး လက်ရှိအချိန်အထိ အသေးစိတ် အချက်အလက်များကို ထုတ်ပြန်ခြင်း မရှိသေးပေ။ တရုတ်နှစ်သစ်ကူးပွဲတော် ဆင်နွှဲရာတွင် မီးရှူးမီးပန်းများမှာ အဓိကအခန်းကဏ္ဍမှ ပါဝင်လေ့ရှိပြီး ယင်းတို့ကို အသုံးပြုမှုကြောင့် မတော်တဆ ထိခိုက်မှုများစွာလည်း ဖြစ်ပွားလေ့ရှိသည်။
