တာချီလိတ်၌ မြန်မာ-ထိုင်း ချစ်ကြည်ရေးအသင်း ရုံးခွဲသစ် ဖွင့်လှစ်

မြန်မာနှင့် ထိုင်း နှစ်နိုင်ငံကြား လူမှုစီးပွားလုပ်ငန်းများ ပိုမိုအဆင်ပြေချောမွေ့စေရန်နှင့် ပြည်သူများ၏ အရေးကိစ္စများကို ကူညီဆောင်ရွက်ပေးနိုင်ရန် ရည်ရွယ်၍ မြန်မာ-ထိုင်း ချစ်ကြည်ရေးအသင်း (တာချီလိတ်ရုံးခွဲ) ဖွင့်ပွဲကို ဖေဖော်ဝါရီ ၁၄ ရက် နံနက်ပိုင်းက တာချီလိတ်မြို့၊ ဆန်ဆိုင်း (ခ) ရပ်ကွက်ရှိ ရုံးသစ်၌ ကျင်းပခဲ့သည်။အခမ်းအနားတွင် အသင်းဥက္ကဋ္ဌ ဦးတင်ဝင်း (သံအမတ်ကြီး-အငြိမ်းစား) က အဖွင့်အမှာစကား ပြောကြားခဲ့ပြီး၊ ရှမ်းပြည်နယ်ဥပဒေချုပ် ဦးစိုင်းကျော်ဇံ၊ ထိုင်းနိုင်ငံဆိုင်ရာ မြန်မာကောင်စစ်ဝန်ချုပ် ဦးမင်းကျော်လင်း နှင့် ထိုင်းနိုင်ငံ၊ ချင်းရိုင်းခရိုင် လဝက ဒုခရိုင်မှူး Mrs. Pasonpon အပါအဝင် နှစ်နိုင်ငံ တာဝန်ရှိသူများက ဖဲကြိုးဖြတ် ဖွင့်လှစ်ပေးခဲ့ကြသည်။ အဆိုပါ ရုံးခွဲသစ်ဖွင့်လှစ်ခြင်းဖြင့် နယ်စပ်ဒေသရှိ နှစ်နိုင်ငံ ပူးပေါင်းဆောင်ရွက်မှုများနှင့် ပြည်သူ့အကျိုးပြု လုပ်ငန်းများတွင် ပိုမိုထိရောက်သော အခန်းကဏ္ဍမှ ပါဝင်လာနိုင်မည်ဖြစ်ကြောင်း သိရှိရပါသည်။