ဂျပန်၌၂၀၂၆ ဘဏ္ဍာနှစ်မတိုင်မီ ဘတ်ဂျက်အတည်ပြုနိုင်ရန် ဝန်ကြီးချုပ် တာကာအိချိ ကြိုးပမ်း

ဂျပန်ဝန်ကြီးချုပ် ဆာနာအဲ တာကာအိချိ (Sanae Takaichi) က ၂၀၂၆ ခုနှစ်၊ ဧပြီလတွင် စတင်မည့် ဘဏ္ဍာနှစ်သစ်မတိုင်မီ အစိုးရ၏ အခြေခံဘတ်ဂျက်ကို လွှတ်တော်တွင် အတည်ပြုနိုင်ရေးအတွက် ဆွေးနွေးမှုများကို အရှိန်မြှင့်ဆောင်ရွက်ရန် ၎င်း၏ အာဏာရ အယ်လ်ဒီပီ (LDP) ပါတီကို စနေနေ့တွင် ညွှန်ကြားလိုက်သည်။ ဇန်နဝါရီလအတွင်းက လွှတ်တော်ကို ရုတ်တရက်ဖျက်သိမ်း၍ ရှောင်တခင်ရွေးကောက်ပွဲ ကျင်းပခဲ့ရခြင်းကြောင့် ဘတ်ဂျက်ဆွေးနွေးပွဲများသည် ပုံမှန်ထက် တစ်လခန့် နောက်ကျနေပြီး၊ မတ်လ ၃၁ ရက်နေ့ နောက်ဆုံးထား၍ အတည်ပြုနိုင်ရန်မှာ ခဲယဉ်းနေသည်။ သို့သော်လည်း ဝန်ကြီးချုပ်က ၎င်းအနေဖြင့် ဘဏ္ဍာနှစ်အတွင်း အတည်ပြုနိုင်ရေးကို လက်မလျှော့သေးကြောင်း ပြောကြားခဲ့ပြီး၊ အာဏာရပါတီသည် ဆွေးနွေးချိန်တိုတောင်းစေရန် လွှတ်တော်အမတ်များ၏ မေးခွန်းမေးမြန်းချိန်ကို လျှော့ချရန် စဉ်းစားနေသည်။ ဤလုပ်ရပ်အပေါ် အတိုက်အခံများဘက်မှ ပြင်းပြင်းထန်ထန် ကန့်ကွက်လာနိုင်ဖွယ်ရှိနေပြီး အစိုးရအနေဖြင့် ဘတ်ဂျက်အမြန်အတည်မပြုနိုင်ပါက ကြားဖြတ်ဘတ်ဂျက် (Interim budget) တစ်ခုကို ပြင်ဆင်ထားရမည်ဖြစ်သည်။