ခါး အတိုင်းအတာနဲ့ အရပ်အမြင့် အချိုးကို နှိုင်းယှဉ်ကြည့်တာဟာ လူသိများတဲ့ BMI တိုင်းတာမှုထက် နှလုံးရောဂါ ဖြစ်နိုင်ခြေကို ပိုပြီး တိတိကျကျ ခန့်မှန်းပေးနိုင်တာကို UPMC နဲ့ Pittsburgh တက္ကသိုလ်မှ သုတေသီတွေက ရှာဖွေတွေ့ရှိခဲ့တယ်လို့ သိရပါတယ်။BMI က အရပ်နဲ့ ကိုယ်အလေးချိန်ကိုပဲ ကြည့်တာဖြစ်ပေမယ့် ဒီတိုင်းတာမှုကတော့ နှလုံးကျန်းမာရေးအတွက် အရေးကြီးတဲ့ ခန္ဓာကိုယ်ထဲကအဆီတွေ ဘယ်နေရာမှာစုနေသလဲဆိုတာကိုပါ ဖော်ပြပေးနိုင်တာဖြစ်တာကြောင့် သုတေသီတွေဟာ လူပေါင်း ၂၇၂၁ ဦးရဲ့ ကျန်းမာရေးဆိုင်ရာ အချက်အလက်တွေကို ၅ နှစ်ကျော်ကြာ စောင့်ကြည့်လေ့လာခဲ့ကြတာ ဖြစ်တယ်လို့ သိရပါတယ်။ထို့သို့ လေ့လာခဲ့မှုအရ အသက်အရွယ်၊ ကျန်းမာရေးရာဇဝင်နဲ့ တခြားအချက်တွေကို ထည့်သွင်းတွက်ချက်ပြီးနောက် ခါး အတိုင်းအတာနဲ့ အရပ်အမြင့် အချိုးအစားဟာ နှလုံးရောဂါဖြစ်နိုင်ခြေကို အမှန်ကန်ဆုံးဖော်ပြနိုင်တဲ့ အညွှန်းကိန်းဖြစ်နေတာ တွေ့ရတယ်လို့လည်း ပညာရှင်များက ပြောကြားထားပါတယ်။ကိုယ်အလေးချိန် အရမ်းမများဘဲ BMI ၃၀ အောက်သာရှိတဲ့လူတွေမှာတောင် ဒီလိုအချိုးအစားက သုည ဒသမ ၅ ထက်ကျော်နေရင် နောင်တစ်ချိန်မှာ နှလုံးသွေးကြောကျဉ်းရောဂါဖြစ်နိုင်ခြေ ပိုများနေတာကို သတိထားမိခဲ့ကြတဲ့အပြင် လူတစ်ယောက်ရဲ့ ကိုယ်အလေးချိန်၊ ကိုလက်စထရောနဲ့ သွေးပေါင်ချိန်တွေက ပုံမှန်ဖြစ်နေရင်တောင် အခုအချိုးအစားကိုကြည့်ပြီး နှလုံးရောဂါဖြစ်နိုင်ခြေကို စောစောစီးစီးသိနိုင်တယ်လို့ ပညာရှင်များက ဆိုထားပါတယ်။
