ကယား(ကရင်နီ)ပြည် ဒီးမော့ဆိုမြို့နယ်တွင် ဆိုင်ငှားခနဲ့ မြေငှားရမ်းခ မြင့်တက်နေဆဲဖြစ်ကာ ၂၀၂၅ နှစ်ကုန်ပိုင်းကစပြီး စျေးအရောင်းအဝယ် လုပ်ကိုင်နေကြတဲ့ ဒေသခံအများစုဟာ ရောင်းအား ကျဆင်းလာပြီး အခက်အခဲ ကြုံတွေ့နေရတယ်လို့ ဆိုပါတယ်။"ဆိုင်ငှားတာက တချို့ဆို တခန်းထဲ (၅)သိန်းရှိတာပေါ့၊ ဒီမှာတော့ ၂ သိန်းပေါ့၊ အဲ့တော့ စျေးရောင်းတာနဲ့ မြေငှားခ၊ ဆိုင်ငှားခတွေက သိပ်မကိုက်ဘူးလေး"လို့ ဒီးမော့ဆိုမြို့နယ် အနောက်ဘက်ခြမ်းမှာ စျေးရောင်းဝယ်ရေး လုပ်ကိုင်သူ အမျိုးသမီးတဦးက ဆိုပါတယ်။လက်ရှိ ဒီးမော့ဆို အနောက်ခြမ်းက လမ်းမကြီးဘေး မြေနေရာမှာ တလတာ ငှားရမ်းခ အနည်းဆုံး ကျပ် ၅၀,၀၀၀ ကနေ ကျပ် ၁၅၀,၀၀၀ ခန့်ရှိနေပြီး၊ လူနေအိမ်၊ ဆိုင်ခန်း ငှားရမ်းခအတွက် အနည်းဆုံး ၂ သိန်းကျပ်ကနေ ၅ သိန်း အထိ ရှိတယ်လို့ သိရပါတယ်။
