ကင်မ်ဂျုံအန်း၏သမီး ကင်မ်ဂျူအဲမှာ အမွေဆက်ခံမည့်သူဖြစ်ကြောင်း ပိုမိုခိုင်မာလာဟု တောင်ကိုရီးယားထောက်လှမ်းရေး သုံးသပ်

မြောက်ကိုရီးယားခေါင်းဆောင် ကင်မ်ဂျုံအန်းသည် သမီးဖြစ်သူ ကင်မ်ဂျူအဲကို ၎င်း၏ အမွေဆက်ခံမည့်သူအဖြစ် အခိုင်အမာ ပြင်ဆင်နေပြီး မူဝါဒရေးရာများတွင်ပါ သမီးဖြစ်သူက တိုက်ရိုက်ပါဝင်ပတ်သက်နေသည့် လက္ခဏာများရှိနေကြောင်း တောင်ကိုရီးယား အမျိုးသားထောက်လှမ်းရေးအဖွဲ့ (NIS) က ထုတ်ဖော်ပြောကြားလိုက်သည်။ ယခင်က လေ့လာသင်ယူဆဲအဆင့်ဟုသာ ယူဆခဲ့သော်လည်း ယခုအခါ ကွင်းဆင်းစစ်ဆေးမှုများတွင် မူဝါဒဆိုင်ရာ ထင်မြင်ချက်များ ပေးလာခြင်းကြောင့် "အတွင်းပိုင်း အမွေခံအဖြစ် လျာထားခံရသူ" အဆင့်သို့ ရောက်ရှိနေပြီဟု သုံးသပ်ထားသည်။ ထို့အပြင် ကင်မ်ဂျုံအန်းသည် နျူကလီးယားစွမ်းအင်သုံး ရေငုပ်သင်္ဘောကြီးတစ်စင်း တည်ဆောက်ရန် ညွှန်ကြားထားကြောင်းလည်း သိရှိရပါသည်။