မိခင်မှကလေးသို့ ဘီပိုးကူးစက်မှု ကာကွယ်ရန် ဗဟိုအမျိုးသမီးဆေးရုံကြီး ၃ ခု၌ ကုသမှုများ စတင်တော့မည်

မိခင်မှတစ်ဆင့် ကလေးငယ်ထံသို့ HIV၊ ဆစ်ဖလစ်နှင့် အသည်းရောင်အသားဝါ (ဘီ) ပိုး ကူးစက်မှု ကင်းဝေးစေရန် (Triple Elimination) ကျန်းမာရေးဝန်ကြီးဌာနက အထူးဦးတည်ဆောင်ရွက်လျက်ရှိရာ၊ အသည်းရောင်အသားဝါ (ဘီ) ရောဂါ စစ်ဆေးကုသမှုများကို ကနဦးအနေဖြင့် ရန်ကုန်၊ မန္တလေးနှင့် နေပြည်တော်ရှိ ဗဟိုအမျိုးသမီးဆေးရုံကြီး ၃ ခုတွင် လာမည့် ဧပြီလမှစတင်၍ ဆောင်ရွက်ပေးသွားမည်ဖြစ်ကြောင်း ပြည်သူ့ကျန်းမာရေးဦးစီးဌာန ညွှန်ကြားရေးမှူးချုပ် ဒေါက်တာမြတ်ဝဏ္ဏစိုးက ပြောကြားခဲ့သည်။ အဆိုပါဆေးရုံကြီးများတွင် ကိုယ်ဝန်ဆောင်မိခင်များကို ဘီပိုး ရှိ/မရှိ စစ်ဆေးပေးခြင်း၊ ပိုးတွေ့ရှိပါက ပိုးကောင်ရေ စစ်ဆေးပေးခြင်းနှင့် လိုအပ်သော ဆေးကုသမှုများ ပေးအပ်ခြင်းတို့ကို အခမဲ့ဆောင်ရွက်ပေးသွားမည်ဖြစ်သည်။ ဤစီမံချက်သည် ၂၀၃၀ ပြည့်နှစ်တွင် မိခင်မှကလေးသို့ ကူးစက်တတ်သော ရောဂါများ ပပျောက်စေရန် ရည်ရွယ်သည့် Triple Elimination of MTCT လုပ်ငန်းစဉ်၏ အစိတ်အပိုင်းတစ်ခုဖြစ်ကြောင်း နေပြည်တော်၌ ပြုလုပ်သော ညှိနှိုင်းဆွေးနွေးပွဲအရ သိရှိရပါသည်။