၂၀၂၆ ယူ ၁၇ အမျိုးသား နှင့် အမျိုးသမီး အာရှဖလားပြိုင်ပွဲများအတွက် မဲခွဲပွဲ ယနေ့ ပြုလုပ်မည်

မြန်မာ လူငယ် အမျိုးသား နှင့် အမျိုးသမီး ယူ ၁၇ အသင်းများ ခြေစစ်ပွဲအောင်မြင်ထားသည့် ၂၀၂၆ ယူ ၁၇ အမျိုးသား နှင့် အမျိုးသမီး အာရှဖလားပြိုင်ပွဲများအတွက် မဲခွဲပွဲကိုတော့ ယနေ့ ဖေဖော်ဝါရီလ ၁၂ ရက်နေ့ မလေးရှားနိုင်ငံ ကွာလာလမ်ပူမြို့မှာ မြန်မာစံတော်ချိန် နေ့လည် ၁ နာရီ ၃၀ မိနစ်အချိန်မှာ ကျင်းပ ပြုလုပ်သွားမှာဖြစ်ပါတယ်။ မြန်မာအမျိုးသား ယူ ၁၇ အသင်းယှဥ်ပြိုင်ကစားသွားမယ့် AFC U-17 Asian Cup 2026 (men) ပြိုင်ပွဲကိုတော့ ဆော်ဒီအာရေးဘီးယား နိုင်ငံကနေ လက်ခံကျင်းပသွားမည်ဖြစ်ပြီး ခြေစစ်ပွဲအောင်မြင်ထားသည့် အသင်းပေါင်း ၁၆ သင်း ပါဝင်ကာ ပြိုင်ပွဲကိုတော့ မေလ ၅ ရက် ကနေ မေလ ၂၂ ရက်နေ့အထိကျင်းပ သွားမှာဖြစ်ပါတယ်။ မြန်မာအမျိုးသား ယူ ၁၇ အသင်းကတော့ အုပ်စုမဲခွဲပွဲမှာ မဲအိုး နံပါတ် ၄ မှာ မြောက်ကိုရီးယား ၊ UAE နှင့် ကာတာအသင်းတို့နဲ့အတူ ကျရောက်နေပါတယ်။ မဲအိုး နံပါတ် ၃ မှာကတော့ အိန္ဒိယ ၊ ဗီယက်နမ် ၊ တရုတ် နှင့် ထိုင်း အသင်းတို့ပါဝင်နေတာကြောင့် မြန်မာအသင်းကတော့ အုပ်စုတွင်းမှာ အိမ်နီးချင်းပြိုင်ဘက် တစ်သင်းသင်းနဲ့တော့ အတူတူကျရောက်ဖို့ရှိနေပါတယ်။ မြန်မာအမျိုးသား ယူ ၁၇ အသင်းယှဥ်ပြိုင်ကစားသွားမယ့် AFC U-17 Asian Cup (men) ပြိုင်ပွဲရဲ့ လက်ရှိချန်ပီယံကတော့ ဥဇဘတ်ကစ္စတန်အသင်းဖြစ်ပြီး ဒီပြိုင်ပွဲမှာ အုပ်စုအဆင့်ကနေ နောက်တစ်ဆင့်တက်နိုင်တဲ့ အသင်းပေါင်း ရှစ်သင်းကတော့ FIFA U-17 World Cup Qatar 2026 (ယူ ၁၇ အမျိုးသား ကမ္ဘာ့ဖလား) ပြိုင်ပွဲကို တိုက်ရိုက်ဝင်ရောက်ကစားခွင့်ရမယ့် အခွင့်အရေးရှိနေတာပဲဖြစ်ပါတယ်။