ရခိုင်ပြည်နယ်၊မာန်အောင်မြို့နယ်ကပင်လယ်ပြင်မှာ ရေလုပ်သားငါးယောက်ပါ ငါးဖမ်းလှေတစ်စီး ပျောက်ဆုံးနေ

ရခိုင်ပြည်၊ မာန်အောင်မြို့နယ်မှာ ပင်လယ်ပြင်သို့ ငါးဖမ်းထွက်သွားတဲ့ ဒေသခံရေလုပ်သားငါးယောက်ပါဝင်တဲ့ ငါးဖမ်းလှေတစ်စီးဟာ ခြောက်ရက်တိုင် ပျောက်ဆုံးနေပြီး အဆက်အသွယ်မရရှိဘဲဖြစ်နေတယ်လို့ မိသားစုဝင်တွေဆီကနေ သိရပါတယ်။မာန်အောင်မြို့နယ်၊ ဇီးတောကျေးရွာက ဦးလူပုတို့သားဖနှစ်ယောက်အပါအဝင် ငါးဖမ်းသမားလေးယောက်ဟာ ပြီးခဲ့တဲ့ ဖေဖော်ဝါရီလ ၅ ရက်နေ့မှာ ပင်လယ်ပြင်သို့ လုပ်ငန်းခွင်ဝင်ဖို့ ထွက်ခွာသွားခဲ့ပေမဲ့ မနေ့ ဖေဖော်ဝါရီလ ၁၁ ရက်အထိ တစ်စုံတစ်ရာ အဆက်အသွယ် မရရှိသေးဘူးလို့ မိသားစုဝင်တစ်ယောက်က ပြောပါတယ်။ပျောက်ဆုံးနေမှုနဲ့ပတ်သက်လို့ ဒေသတွင်းက တခြားငါးဖမ်းလှေတွေနဲ့ ပင်လယ်ပြင်အတွင်း လိုက်လံရှာဖွေမှုတွေပြုလုပ်ခဲ့ပေမဲ့လည်း လက်ရှိအချိန်အထိ တစ်စုံတစ်ရာ ရှာဖွေတွေ့ရှိတာ မရှိသေးဘူးလို့ ဆိုပါတယ်။မိသားစုဝင်တစ်ယောက်က "ပင်လယ်ထွက်သွားတာ ၅ ရက်၊ ၆ ရက် ရှိနေပါပြီ၊ အခုထိ အဆက်အသွယ်မရတော့ အိမ်ကလူတွေ အားလုံး စိတ်ပူနေကြပါတယ်။ တခြားဘုတ်တွေနဲ့ လိုက်ရှာတာလည်း မတွေ့သေးဘူးဖြစ်နေတယ်"လို့ ပြောပါတယ်။